Read Plautdietsch (Low German) – De Bibel Psalmen 65 Bible Online

Psalmen 65 - Plautdietsch (Low German) – De Bibel bible

Psalmen 65

¹Eent von David siene Psalmen, väatosinjen.

²Gott, du woascht en Zion en Ieaforcht jeloft woaren, un wie woaren die jäwen, waut wie vesproaken haben.

³Du hieescht onse Jebäda, doawäajen kjemt aulemaun no die.

⁴Aus de Sind bie ons Äwahaunt neem, vejeefst du ons onse Äwaträdungen.

⁵Jesäajent sent dee, dee du die wälst un no die nemst, bie die opp däm Tempelhoff to wonen; wie haben vollopp aul daut goode en dien Hus, dien heilja Tempel.

⁶Du auntwuatst ons derch jewaultje Wundawoakjen un Jerajchtichkjeit, oo Gott onse Radunk. Du best de eensje Hopninj fa aulem, soo wiet aus Ieed un Mäa rieekjen.

⁷Du, dee du derch diene Krauft de Boaj häajestalt hast, du bewiest doaderch diene Macht.

⁸Du, dee daut ruzhende Mäa stellen deist, du stelst de Walen äa Jeruzh un de Velkja äa tooben.

⁹Dee doa wiet auf wonen, haben Respakjt fa diene Wunda. Du moakst daut de Sonnen Oppgank un de Sonnen Unjagank met Freiden sinjen.

¹⁰Du sorchst fa daut Launt un latst daut räajnen, un moakst daut doaderch sea rikj. Gott siene Wotastreem sent voll, de Menschen met Jeträajd to vesorjen, wiels soo hast du daut enjerecht.

¹¹Du schekjst Räajen daut Pluachlaunt auntofeichten un de Kjlieta opptowieekjen. Du helst daut Launt wieekj derch Räajenschwoakja, un säajenst de Arnt.

¹²Du kjreenst daut Joa met väl goot, un doa wua du jeist, es mea aus jenuach.

¹³De Weidstapen un de Wiltnis sent uk dikj voll, un de läaje Boaj omhäa sent froo un lostich.

¹⁴De Weidlenda sent voll Schop, un de Schluchten sent met Jeträajd bedakjt. Dee sent froo, daut see schrieen un sinjen.