Read Plautdietsch (Low German) – De Bibel Psalmen 66 Bible Online

Psalmen 66 - Plautdietsch (Low German) – De Bibel bible

Psalmen 66

¹Een Psalmleet, väatosinjen. Jucht to Gott, aule Velkja oppe Ieed!

²Sinjt lowent sienen Nomen to ieren; sajcht aulem woo harlich hee es.

³Sajcht to Gott: Woo wundavoll sent doch diene Woakjen! Diene Krauft es soo groot, daut diene Fiend sikj ver die kjremmen.

⁴Aulemaun oppe Ieed deit die aunbäden. See lowen die met Leeda; see sinjen un lowen dienen Nomen.

⁵Komt un kjikjt waut Gott jedonen haft. Woo wundavoll sent doch siene Woakjen om de Menschen äat haulwen!

⁶Hee muak ut daut Mäa drieejet Launt. See jinjen tofoot derch däm Riefa. Komt, well wie ons to am freien.

⁷Hee rejieet eewich derch siene Krauft; siene Uagen seenen waut de Velkja doonen. Lot de wadaspanstje nich jäajen am oppstonen.

⁸Loft onsen Gott, jie Velkja; lot daut to hieren sennen, daut jie am lowen,

⁹dee onse Seelen aum läwen helt, un onse Feet nich jleppen lat.

¹⁰Wiels du, oo Gott, hast ons utjeprooft; du hast ons derch däm Fia jeschekjt, soo aus Selwa jereinicht woat.

¹¹Du leetst ons faustnämen, un lädsd ons schwoare Lausten opp de Rigjes.

¹²Du brochst daut bat doa, daut Menschen ons äwa de Kjap fuaren; wie jinjen derch Fia un Wota; oba du brochst ons no een Plauz wua wie aules vollopp hauden.

¹³Ekj woa met Brauntopfa en dien Tempel nenn gonen un die betolen waut ekj vesproaken hab,

¹⁴daut, waut äwa miene Leppen kjeem un mien Mul vespruak, aus ekj en Trubbel wia.

¹⁵Ekj woa die fate Schop aus Brauntopfa brinjen, uk een Opfa von Schopsbakj. Ekj woa uk Bolles un Kosen opfren.

¹⁶Komt un horcht aula, dee jie Gott ferchten, un ekj woa junt sajen waut hee fa mie jedonen haft.

¹⁷Ekj schrieech am aun ut vollem Hauls; ekj lowd am met mien Mul.

¹⁸Wan ekj met Ojjerajchtichkjeit em Hoat omjinkj, wudd de Har nich no mie jehorcht haben.

¹⁹Oba Gott haft bestemt no mie jehorcht, un doaropp jeacht waut ekj bäden deed.

²⁰Ekj low Gott, dee mien Jebäd nich vestad un siene truhoatje Leew nich von mie trigjhilt.