Read Plautdietsch (Low German) – De Bibel Psalmen 67 Bible Online

Psalmen 67 - Plautdietsch (Low German) – De Bibel bible

Psalmen 67

¹Een Psalmleet, met Seidenspell väatosinjen.

²Gott, schekj ons Jnod un Säajen, un kjikj ons frintlich aun,

³daut diene Wäaj oppe Ieed bekaunt woaren, un diene Radunk mank aule Velkja.

⁴Muchten de Velkja die lowen, oo Gott; muchten aule Velkja die lowen.

⁵Muchten aule Velkja froo sennen un met Freiden sinjen, daut du de Menschen jerajcht rechten deist, un daut du de Velkja oppe Ieed rajcht fieren deist.

⁶Muchten de Velkja die lowen, oo Gott; muchten aule Velkja die lowen.

⁷Wiels daut Launt haft eene Arnt jebrocht, un Gott, ons Gott, haft ons jesäajent.

⁸Gott woat ons säajnen; doawäajen sull am aulemaun en de gaunze Welt aunbäden.