Read Plautdietsch (Low German) – De Bibel Psalmen 72 Bible Online

Psalmen 72 - Plautdietsch (Low German) – De Bibel bible

Psalmen 72

¹Von Salomo. Gott jeff däm Kjennich, daut hee met dien jerajchtet Jerecht rechten un rejieren kaun; un jeff diene Jerajchtichkjeit dän Kjennich sien Sän.

²Lot am dien Volkj jerajcht rechten, un met Jerajchtichkjeit diene oame utem Älent raden.

³Auf opp de Boaj ooda de kjliene Humpels, Jerajchtichkjeit saul dien Volkj em gaunzen Launt Fräd brinjen.

⁴Hee saul de unjadrekjte em Volkj to rajcht vehalpen, un de oame äare Kjinja raden, un dee enne Grunt brinjen, dee Jewault eewen.

⁵Derch aule Jennerazionen saul am aulemaun ferchten soo lang aus de Sonn un de Mon doa sent.

⁶Hee saul soo sennen aus Räajen opp daut aufjeschnädnet Graus, soo aus een Sodda, dee daut Launt aunfeicht.

⁷En siene Tiet woat de Jerajchtichkjeit blieejen, un aules woat frädlich sennen bat de Mon nich mea es.

⁸Hee woat von een Mäa bat daut aundre rejieren, un vom Riefa aun bat äwa de gaunze Ieed.

⁹Daut Volkj en de Wiltnis woat sikj ver am bieejen, un aul siene Fiend woaren am deenen.

¹⁰De Kjennichs von Tarsis un von de Inseln woaren Jeschenkja brinjen. De Kjennichs von Rikj Arabien un Seba woaren uk äare Gowen brinjen.

¹¹Aule Kjennichs woare sikj ver am bieejen. Un aule Velkja woaren am deenen.

¹²Wiels hee woat de oame raden wan dee schrieen, uk de unjadrekjte, dee kjeenen Helpa haben.

¹³Hee woat äwa de schwake un oame Metleet haben, un de oame woat hee vom Doot raden.

¹⁴Hee woat an von dee raden, dee an unjadrekjen un vejewaultjen; äa Bloot es ver am huach un dia.

¹⁵Mucht de Kjennich lang läwen! Mucht am Golt von Rikj Arabien jeschonken woaren. Muchten de Menschen emma fa am bäden, un am dän dachäwa säajnen.

¹⁶Mucht doa jenuach Jeträajd em Launt sennen, un de Boaj bat bowen dicht voll stonen, soo aus opp däm Libanon, un en de Städa sellen dee utjreenen, soo aus Graus opp de Stap.

¹⁷Sien Nomen saul eewich bliewen; mucht dee soo lang bliewen aus de Sonn. Aule Velkja woaren derch am jesäajent woaren, un woaren sajen, daut hee jesäajent es.

¹⁸Loft dän HARN, Israel äaren Gott, de eensja dee doa Wundawoakjen deit.

¹⁹Sien harlicha Nomen saul eewich jeloft woaren; siene Harlichkjeit saul äwa de gaunze Ieed rieekjen. Amen. Amen.

²⁰Dit sent de latste von David, Isai sienen Sän, siene Jebäda.