Read Plautdietsch (Low German) – De Bibel Psalmen 74 Bible Online

Psalmen 74 - Plautdietsch (Low German) – De Bibel bible

Psalmen 74

¹Unjarecht von Asaf. Gott, wuarom hast du ons opp emma vestat, un wuarom jläat dien Oaja jäajen diene ieejne Schop opp diene Weid?

²Denkj aun diene Jemeent, dee du lang trigj fa die vesorcht hast; daut es dien Volkj, woont du die loosjekoft hast. Denkj aun dän Boajch Zion, wua du wonst.

³Go emol äwa dän Tempel, dee aul soo lang doljebroaken licht; de Fient haft em Heilichtum aules en de Grunt jebrocht.

⁴Doa wua wie ons met die tooptrafen, es nu diene Fiend äa Jeschrech to hieren. Dee haben sikj äare ieejne Flagen oppjestalt.

⁵Daut sitt soo aus wan doa wäa es met eene Akjs mank jewast, aus wan hee een Woolt dolhakt.

⁶Dee haben aul daut utjeoabeide Straums met äare Biels un Akjsen to Grus jeschloagen.

⁷Dee haben dien Heilichtum jlikjs de Ieed doljebrent. Dee haben dän Plauz, dee no dienen Nomen jenant woat, veorreinicht.

⁸Dee haben sikj em Hoat jesajcht: Wie wellen dee gaunz unjaklunjen. Dee haben aule Städa em Launt doljebrent, wua Gott aunjebät wort.

⁹Ons woaren kjeene Wundatieekjens mea jejäft; doa sent kjeene Profeeten jebläwen, un kjeena von ons weet woo lang dit soo bliewen woat.

¹⁰Woo lang, oo Gott, woat de Fient noch äwa die spotten? Woat de Fient emma äwa die schempen?

¹¹Wuarom helst du diene Haunt trigj? Nemm diene rajchte Haunt ut de Fupp un moak een Enj met an.

¹²Oba du, oo Gott, best mien Kjennich ut oole Tieden. Du hast ons eene Radunk em Launt jebrocht.

¹³Du deetst derch diene jewaultje Krauft daut Mäa uteneen deelen. Du bruakst de groote Droaken em Wota de Kjap.

¹⁴Daut wieescht du, dee de Leviatan de Kjap vekjwatscht, un doamet de Tieren en de Wiltnis foodad.

¹⁵Du leetst Kjwalen un Wotastreem äwadäl komen, un du leetst stoakje Streem utdrieejen

¹⁶De Dach es diena, un die jehieet uk de Nacht. Du hast Sonn un Mon häajestalt.

¹⁷Du hast aule Jrensen tweschen Launt un Wota jetrocken; du hast uk Somma un Winta jemoakt.

¹⁸Denkj doaraun, oo HAR, woo de Fient äwa die jespott haft, woo de Menschen äwa dienen Nomen jespott un jeschempt haben.

¹⁹Jeff dien Volkj, daut doa soo schwak es aus eene junge Duw, nich no de wille Tieren.

²⁰Hool die aun dienen Bunt, wiels de Lenda opp de Ieed, dee em diestren sent, woaren von kjwälarische Menschen bewont.

²¹Lot de unjadrekjte nich beschämt trigj gonen. Lot de schwake un oame dienen Nomen lowen.

²²Sto opp, oo Gott, un sto en fa diene Sach; denkj doaraun, woo de Noaren die dän dachäwa spotten.

²³Vejat nich diene Fiend äa Jeschrech, un woo diene Jäajna äa Klommua biem toonämen blift.