Read Plautdietsch (Low German) – De Bibel Psalmen 75 Bible Online

Psalmen 75 - Plautdietsch (Low German) – De Bibel bible

Psalmen 75

¹Een Psalmleet von Asaf, väatosinjen.

²Wie danken die, oo Gott, wie danken die. Diene Wundawoakjen bewiesen, daut dien Nomen dicht bie es.

³Du sajchst: Ekj woa de rajchte Tiet bestemmen en dee ekj rechten woa, un ekj recht opprechtich.

⁴Wan uk de Ieed un aule Menschen doabowen schedren, hool ekj äare Dräaja aum Plauz.

⁵To de stolte säd ekj, see sullen nich mea puchen, un to de gottloose, see sullen äare Hieena nich opphäwen.

⁶Häft june Hieena nich nom Himmel opptoo, un rät nich soo dikjenekjich.

⁷Doa es kjeena em Oosten ooda em Wasten ooda en de Wiltnis, dee een Mensch erhäwen kaun.

⁸Oba daut es Gott, dee doa rechten deit; hee stalt eenem läach un dän aundren hecha.

⁹De HAR haft en siene Haunt een Kuffel voll rooden, schumenden Wien, dän hee utjitt, un aule gottloose opp de Ieed drinkjen dän bat de latste Drepp.

¹⁰Ekj oba woa läweslank doavon räden, un Jakob sienen Gott met Leeda lowen.

¹¹Hee woat de gottloose äare Krauft bräakjen, oba de jerajchte äare Krauft woat toonämen.