Read Plautdietsch (Low German) – De Bibel Psalmen 77 Bible Online

Psalmen 77 - Plautdietsch (Low German) – De Bibel bible

Psalmen 77

¹Eent von Asaf siene Psalmen fa Jedutun, väatosinjen.

²Ekj schrieech to Gott om Help! Ekj schrieech to Gott, daut hee mie hieren sull.

³Wan ekj en Noot sie, sieekj ekj dän Harn. Miene Haunt wia de Nacht äwa utjestrakjt un wort nich meed, wiels miene Seel wull sikj nich treesten loten.

⁴Wan ekj aun Gott denkj, schrie ekj ut Veläajenheit, un denkj äwa de gaunze Sach no, un dan sinkjt mie de Moot.

⁵Du helst mie de Uagen op, daut ekj nich schlopen kaun. Ekj sie soo veläajen, daut ekj nich räden kaun.

⁶Ekj denkj aun de oole Tieden un aun de Joaren von ieescht emma.

⁷Ekj denkj de Nacht aun waut ekj jesungen hab, un räd met mien Hoat, un mien Jeist mott forschen.

⁸Woat de Har opp eewich vesteeten un kjeene Jnod mea bewiesen?

⁹Haft siene truhoatje Leew dan nu een Enj? Helt hee sikj nich mea aun sien Vespräakjen?

¹⁰Haft Gott vejäten Jnod to bewiesen, un em Oaja sien Metleet trigjehoolen?

¹¹Un ekj säd: Dit es miene Schwakheit. Dän Aulahechsten siene rajchte Haunt kaun aules endren.

¹²Doawäajen denkj ekj doaraun, waut de HAR jedonen haft. Ekj denkj aun diene väaje Wunda.

¹³Un ekj denkj äwa aul diene Woakjen no, un waut du nu deist.

¹⁴Gott, dien Wajch es heilich! Wua es een Gott, soo groot aus ons Gott?

¹⁵Du best dee Gott, dee doa Wunda deit; du hast de Velkja diene Krauft bewäsen.

¹⁶Du hast dien Volkj derch dien jewaultjen Oarm jerat, Jakob un Josef äare Nokomen.

¹⁷De Wota sagen die, oo Gott, de Wota sagen die un hauden angst. De deepste Wota toobden.

¹⁸De dikje Wolkjen gooten Wota, de Rummel rold, un de Strolen fuaren han un häa.

¹⁹Daut rummeld em Himmel, diene Blitzen bedachten dän Ieedboddem, daut de Ieed doavon bäbd un scheddad.

²⁰Dien Wajch wia em Mäa, un dien Stich en de groote Wota, wan uk kjeena diene Footspoaren seenen kunn.

²¹Du brochst dien Volkj soo aus eene Häad Schop derch, met Moses un Aaron aus äare Hoad.