Read Plautdietsch (Low German) – De Bibel Psalmen 79 Bible Online

Psalmen 79 - Plautdietsch (Low German) – De Bibel bible

Psalmen 79

¹Een Psalm von Asaf. Oo Gott, de Velkja sent en dien ieejnet Launt nenn jekomen; dee haben dienen heiljen Tempel veorreinicht un ut Jerusalem een Steenklompen jemoakt.

²Dee haben diene Deena äare Kjarpa no de Väajel unja däm Himmel to fräten jejäft, un diene fromme äa Fleesch no de Tieren em Launt.

³Dee haben rom Jerusalem äa Bloot vegoten, aus wan daut Wota wia, un doa wia kjeena de Doodes to begrowen.

⁴Wie sent fa onse Nobasch eene Schaundplak jeworden, een veachtenda Spott fa dee, dee om ons sent.

⁵Woo lang, oo HAR? Woat dien Oaja emma bliewen? Woo lang woascht du diene Aufgonst brennen loten?

⁶Poasch dien Oaja äwa de Velkja, dee die nich kjanen; äwa de Kjennichsrikjs, dee dienen Nomen nich aunroopen.

⁷Dee haben Jakob to nuscht jemoakt un sien jeorwnet Launt en de Grunt jebrocht.

⁸Hool onse Vodasch äare Sinden nich jäajen ons; hab Metleet boolt äwa ons, wiels fa ons es nich mea väl jebläwen.

⁹Halp ons, oo Gott ons Heilant, om dienen Nomen to ieren. Rad ons un vejeff ons onse Sinden om dienen Nomen sient haulwen.

¹⁰Wuarom latst du de Velkja sajen: Wua es äa Gott? Lot ons daut noch seenen, daut du de Velkja doafäa strofst, daut see diene Deena äa Bloot vegoten haben.

¹¹Lot de faustjenomne äa stänen ver die komen, un met dienen jewaultjen Oarm halp dee loostokomen, dee toom Doot veuadeelt sent.

¹²Oo Har, laj onse Nobasch säwenmol soo väl Spott oppem Kopp, aus see no die jeschmäten haben.

¹³Wie oba, dien Volkj un Schop opp diene Weid, woaren niemols opphieren die to danken, un woaren emma wada to onse Nokomen doavon räden, waut du jedonen hast.