Read Plautdietsch (Low German) – De Bibel Psalmen 80 Bible Online

Psalmen 80 - Plautdietsch (Low German) – De Bibel bible

Psalmen 80

¹Een Psalm un een Zeichnis von Asaf, no de Leljenwies väatosinjen.

²Du Hoad äwa Israel, horch no ons! Du, dee Josef heeden deist aus eene Häad Schop, du, dee tweschen de Cheruben opp däm Troon setst, komm verendach!

³Ver Efraim, Benjamin un Manasse, räaj diene Aulmacht opp un rad ons.

⁴Brinj ons wada trigj, oo Gott, un kjikj ons leeftolich aun, dan woa wie jerat sennen.

⁵Oo HAR, aulmajchtja Gott, woo lang woascht du oajalich bliewen jäajen dien Volkj äare Jebäda?

⁶Du jefst an Tronenbroot to äten, un hast an maussenhauft väl Tronen to drinkjen jejäft.

⁷Du hast ons onse Nobasch toom Spott jemoakt, un onse Nobasch lachen äwa ons.

⁸Brinj ons wada trigj un kjikj ons leeftolich aun, dan woa wie jerat sennen.

⁹Du brochst eene Wienrank ut Ägipten; dan juachst du de Velkja äwa daut gaunze Launt un deetst dee doa plaunten.

¹⁰Du muakst Rum fa de Plaunt un leetst dee enwartlen, un dee haft sikj äwa daut gaunze Launt vespreet.

¹¹De Plaunt bedakjt de Boaj met äaren Schauten, un de jewaultje Zeeda met äare Asta.

¹²Dee haft äare Auflaja bat aum Mäa jedräwen, un äare Asta bat aum Riefa.

¹³Wuarom hast du dän Goadentun doljebroaken, daut ar een jiedra beplekjen kaun, dee doa vebie jeit?

¹⁴De Schwien utem Bosch haben dän omjeweelt, un de wille Tieren han dän oppjefräten.

¹⁵Oo aulmajchtja Gott, komm trigj no ons. Kjikj vom Himmel rauf un see dit, un woak äwa dise Wienrank.

¹⁶Dee Wartel, dee diene rajchte Haunt jeplaunt haft, un dee du fa die selfst stoakj jemoakt hast.

¹⁷Dee es aufjeschnäden un met Fia vebrent. Dien Volkj kjemt om, wiels du an dreiwent aunkjikjst.

¹⁸Lot diene Haunt reiwen opp dän Maun aun diene rajchte Sied, dän Sän dän du fa die selfst stoakj jemoakt hast.

¹⁹Dan woa wie nich von die wajchgonen. Lot ons läwen, dan woa wie dienen Nomen aunroopen.

²⁰Brinj ons wada trigj, oo du aulmajchtja Gott! Kjikj ons leeftolich aun, daut wie kjennen jerat woaren.