Read Plautdietsch (Low German) – De Bibel Psalmen 81 Bible Online

Psalmen 81 - Plautdietsch (Low German) – De Bibel bible

Psalmen 81

¹Een Psalm von Asaf, met de Jittoa väatosinjen.

²Sinjt met Freid to Gott, en däm onse Krauft steit. Jucht ut Freid to Jakob sienen Gott.

³Fangt aun to spälen, schlot de Drommel, un spält de Hoap un de Jittoa.

⁴Blost de Trompeet wan daut Niemon es, un uk wan daut Volmon es opp ons Fastdach,

⁵wiels daut es soo Mood en Israel, von Jakob sienen Gott velangt.

⁶Dit sad hee en fa Josef un gaunz Israel toom Aundenkjen, aus see ut Ägipten jinjen, wua see eene framde Sproak hieeden.

⁷Gott sajcht: Daut wia de Dach aus ekj an de Laust von de Schulren neem, un äare Henj worden de Kjarw loos.

⁸Aus du mie en diene Noot aunroopst, holp ekj die. Ekj auntwuad die ut de Jewitta Wolkj un vesocht die aum Wota bie Meriba.

⁹Horch emol, oo mien Volkj, un ekj woa die woarnen. Wan du bloos emol no mie horchen woascht, oo Israel.

¹⁰Jie sellen kjeenen framden Gott mank junt haben, un sellen kjeen framden Gott aunbäden.

¹¹Ekj sie de HAR, dien Gott, dee die ut Ägipten rut brocht; moak dien Mul wiet op, ekj woa die daut fellen.

¹²Oba mien Volkj horcht nich no mie; Israel well mie nich.

¹³Doawäajen hab ekj an bie äare vestokte Hoaten jeloten, un see läwen no äa ieejnet gootdenkjen.

¹⁴Wan mien Volkj mie wudd jehuarsom sennen, un Israel en miene Wäaj gonen wudd,

¹⁵wudd ekj äare Fiend sea schwind unjadrekjen un miene Haunt jäajen äare Jäajna dreien.

¹⁶Dee dän HARN fientlich sent, wudden sikj ver am kjremmen un äare Strof wudd emma bliewen.

¹⁷Oba ekj wudd junt dän basten Weit to äten jäwen un met Honnich utem Steen saut moaken.