Read Plautdietsch (Low German) – De Bibel Psalmen 83 Bible Online

Psalmen 83 - Plautdietsch (Low German) – De Bibel bible

Psalmen 83

¹Een Psalmleet von Asaf.

²Oo Gott, bliew nich stell, hool nich Fräd, Gott, bliew nich stell!

³Kjikj woo diene Fiend tooben, un woo dee, waut die nich lieden kjennen, de Kjap huach droagen.

⁴Lestich schluten see sikj heemlich toop jäajen dien Volkj; see beroden bie sikj, woo jäajen dee to gonen, dee du beschitzen deist.

⁵See sajen: Komt, well wie dee utroden, daut dee kjeen Volkj mea sent, daut aun dän Nomen Israel nich mea jedocht woat.

⁶See sent sikj unjarenaunda eenich jeworden, jäajen die to gonen.

⁷Daut sent de Edomita, de Ismaelita, de Moabita, de Hagarita,

⁸de Gebalita, de Amonita un Amalekita, de Filista un dee von Tierus.

⁹Assur haft sikj dee uk aunjeschloten, om Loot siene Kjinja to halpen.

¹⁰Vefoa met an soo aus du met de Midianiten deetst, un aus met Sisera un Jabin aum Kischon Riefa,

¹¹dee bie Endor omjebrocht worden un äare Kjarpa vekjeemen, daut see Mest fa de Ieed worden.

¹²Moak daut met äare väaschte, soo aus met Oreb un Seeb, aul äare väaschte, soo aus met Seba un Zalmunna,

¹³dee doa säden: Well wie Gott sien Weidlaunt ennämen.

¹⁴Oo Gott, moak ut an een Wintkjriesel, soo aus Sprie em Wint.

¹⁵Aus Fia daut dän Woolt dolbrent, aus eene Flaum dee dän Boajch en Flaumen sat,

¹⁶soo sat du an too met dien Wada, soo enjst du an met dien Jewittastorm.

¹⁷Bedakj an daut Jesecht met Schaund, soo daut Menschen entlich no dienen Nomen sieekjen woaren, oo HAR!

¹⁸Muchten dee emma en Schaund un Angst bliewen, un omkomen.

¹⁹Dan woaren see daut enseenen, daut du, dee du HAR heeten deist, auleen de Aulahechsta en de Welt best!