Read Plautdietsch (Low German) – De Bibel Psalmen 84 Bible Online

Psalmen 84 - Plautdietsch (Low German) – De Bibel bible

Psalmen 84

¹Een Psalm von Korach siene Säns, met de Jittoa väatosinjen.

²Woo scheen sent diene Woninjen, HAR, dee du aules rejieescht!

³Miene Seel velangt un bangt sikj no Gott siene Väahäw; mien Kjarpa un miene Seel juchen ut Freid, dän läwendjen Gott to seenen.

⁴Soogoa de Spoalinkj haft een Hus jefungen, un de Schwaulem een Nast, wua see äare junge haben kaun, dicht bie dien Aultoa, oo HAR, dee du aules rejieescht, mien Kjennich un mien Gott.

⁵Woo jlekjlich sent dee, dee en dien Hus wonen: dee lowen die emma!

⁶Jlekjlich sent dee, dee äare Krauft en die finjen un von Hoaten en diene Wäaj waundlen.

⁷Wan see derch daut Jaumatol gonen, woat an daut voll Wotakjwalen woaren, un uk de tiedja Räajen woat de Jladen met Wota fellen.

⁸Dee woaren biem gonen emma stoakja, bat see ver äaren Gott en Zion stonen.

⁹Hia mien Jebäd, oo aulmajchtja HAR Gott! Oo Jakob sien Gott, horch no mie!

¹⁰Oo Gott, kjikj ons Schilt, dienen jesaulften Kjennich, jenstich aun.

¹¹Een Dach en diene Väahäw es bäta aus 1.000 sestwua. Ekj wudd leewa bie mien Gott sien Hus aun dee Däa oppaussen, aus en de gottloose äare Hiesa wonen.

¹²Wiels Gott de HAR es Sonn uk Schilt. De HAR jeft Jnod un Iea. Hee helt fa dee nuscht goodet trigj, dee opprechtich en siene Wäaj gonen.

¹³Oo HAR, dee du aules rejieescht, jlekjlich es dee Mensch, dee sikj opp die velat.