Read Plautdietsch (Low German) – De Bibel Psalmen 85 Bible Online

Psalmen 85 - Plautdietsch (Low German) – De Bibel bible

Psalmen 85

¹Een Psalm von Korach siene Säns, väatosinjen.

²HAR, dee du dien Launt verhäa hast Jnod bewäsen un hast Jakob sien faustjenomnet Volkj trigj jebrocht,

³du vejeefst dien Volkj äare Gottloosichkjeit, un bedakjst äare Sinden.

⁴Du deetst don nich Rach eewen. Du hast die von dienen wutjen Oaja trigjetrocken.

⁵Stal ons wada häa, oo Gott, ons Heilant, un sie nich lenja vedrislich äwa ons.

⁶West du emma doll bliewen äwa ons, un dienen Oaja emma äwa onse Nokomen gonen loten?

⁷West du ons dan nich wada beläwen daut dien Volkj sikj äwa die freien kaun?

⁸Wies ons diene truhoatje Leew, oo HAR, un lot ons diene Radunk seenen!

⁹Ekj woa doano horchen, waut Gott de HAR sajen woat; hee vesprakjt ons, sien Volkj un siene heilje, Fräd, wan wie nich wada trigj no ons vedorwnet Läwen gonen.

¹⁰Hee es secha emma reed dee to halpen, dee am ferchten, daut en ons Launt Harlichkjeit wont,

¹¹daut truhoatje Leew un Woarheit sikj trafen, un Jerajchtichkjeit un Fräd sikj kussen,

¹²daut de Menschen oppe Ieed bie de Woarheit bliewen un Gott en Jerajchtichkjeit vom Himmel kjikjt.

¹³De HAR woat secha jäwen waut goot es, un ons Launt woat eene Arnt brinjen.

¹⁴Jerajchtichkjeit jeit ver am, un moakt fa am dän Wajch reed.