Read Plautdietsch (Low German) – De Bibel Psalmen 86 Bible Online

Psalmen 86 - Plautdietsch (Low German) – De Bibel bible

Psalmen 86

¹David sien Jebäd. HAR, horch no mie un jeff mie eene Auntwuat, wiels ekj sie oam un em Älent.

²Bewoa miene Seel, wiels ekj jehia die! Mien Gott, halp dienen Deena, dee sikj opp die velat.

³Har, lot diene Jnod äwa mie komen, wiels ekj kom aule Dach ver die em Jebäd.

⁴Moak dienen Deena de Seel froo; mien velangen, oo Har, es no die!

⁵Wiels du, Har, best goot un reed to vejäwen, un hast eene truhoatje Leew fa aul dee, dee die aunroopen.

⁶Hia mien Jebäd, oo HAR! Horch woo ekj om Jnod schrie!

⁷Wan ekj en Trubbel kom, woa ekj die aunroopen, wiels ekj weet du woascht mie auntwuaten.

⁸Har, mank aule Jetta es kjeena soo aus du; kjeena kaun daut doonen waut du deist.

⁹Aule Velkja, dee du jeschaufen hast, oo Har, woaren ver die komen un die aunbäden; dee woaren dienen Nomen ieren.

¹⁰Wiels du best een groota Gott un deist Wundawoakjen un best de eensja Gott.

¹¹Wies mie dienen Wajch, oo HAR, un ekj woa en diene Woarheit waundlen. Hool mien Hoat bie daut eene, daut ekj dienen Nomen ferchten woa.

¹²Ekj woa die, oo Har mien Gott, von gaunzem Hoaten lowen, un eewich dienen Nomen veharlichen.

¹³Wiels diene truhoatje Leew fa mie es sea groot; du hast miene Seel vom Doot jerat.

¹⁴Gott, de stolte sent jäajen mie oppjestonen, un eene jewaultje Baund steit mie nom Läwen, Menschen dee nich met die räakjnen.

¹⁵Du oba, Har Gott, best voll Jnod un Metleet, du best jeduldich, truhoatich un leeftolich.

¹⁶Oo nemm mie en Jnoden aun. Jeff dienen Deena diene Krauft un rad diene Deenarin äaren Sän!

¹⁷Jeff mie een Tieekjen daut du goodet aun mie deist, daut miene Fiend daut seenen motten un toschaund woaren, wiels du, HAR, mie doch jeholpen un jetreest hast!