Read Plautdietsch (Low German) – De Bibel Psalmen 88 Bible Online

Psalmen 88 - Plautdietsch (Low German) – De Bibel bible

Psalmen 88

¹Een Psalmleet von Korach siene Säns, väatosinjen, no de Wies: De schwake em Älent. Unjarecht von Heman, dän Esrachita.

²Oo HAR Gott, mien Heilant, ekj schrie Dach un Nacht ver die.

³Lot mien Jebäd ver die komen un horch wan ekj schrie.

⁴Wiels met miene Seel es daut jaumalich un ekj hab dän Doot ver de Uagen.

⁵Ekj woa aunjeseenen aus eena, dee reed es fa daut Grauf. Ekj sie aus een Maun, dee kjeene Krauft haft.

⁶Ekj woa aul manke Doodje jetalt, dee soo aus de jeschloagne en de Jräwa ligjen, aun dee du nich mea denkjst; diene Help es fa an aufjeschnäden.

⁷Du hast mie en een deepet diestret Grauf jelajcht.

⁸Dien Oaja licht schwoa opp mie; diene Walen sent von aule Sieden äwa mie jerolt.

⁹Du hast daut soo wiet jebrocht daut miene baste Frind mie veloten, un daut ekj an wadalich sie. Ekj ligj enjeschloten un kaun nich rut.

¹⁰Miene Uagen sent derch aul mien Trua schwak jeworden. HAR, ekj schrie aule Dach no Help. Ekj sto ver die met utjestrakjte Henj.

¹¹Latst du de Doodje diene Wunda seenen? Ooda woaren de Doodje oppstonen un die danken?

¹²Woat em Grauf von diene truhoatje Leew jerät woaren? Es daut em Grauf to seenen, woo tru du best?

¹³Kjennen diene Wunda em diestren jeseenen woaren, ooda diene Jerajchtichkjeit en een Launt, wua aules vejäten es?

¹⁴Ekj oba schrie om Help, oo HAR! Zemorjes kjemt mien Jebäd ver die.

¹⁵HAR, wuarom statst du mie trigj un latst die nich von mie seenen?

¹⁶Ekj hab von junk opp en Angst un Älent jeläft, un sie dicht biem Doot jewast; ekj lied unja diene Schrakjen un sie schia vezoacht.

¹⁷Dien wutja Oaja es äwa mie jekomen. Diene Schrakjen haben mie en de Grunt jebrocht.

¹⁸Dee sent aule Dach om mie soo aus een Huachwota; dee haben mie runtom en äare Jewault.

¹⁹Du hast mie miene Kommaroden un miene Frind wajch jenomen, daut diestre es nu mien eensja Frint.