Read Plautdietsch (Low German) – De Bibel Psalmen 9 Bible Online

Psalmen 9 - Plautdietsch (Low German) – De Bibel bible

Psalmen 9

¹Een Psalm von David, von de scheene Jugent, väatosinjen.

²Ekj dank die met mien gaunzet Hoat un woa von aul diene Wundawoakjen räden.

³Ekj woa mie freien un om dient haulwen froo sennen. Ekj sinj dienen Nomen to lowen, du Aulahechsta.

⁴Du hast miene Fiend trigj jejoacht; dee sent ver die jefollen un omjekomen.

⁵Du hast mien Rajcht un miene Sach opprajcht jehoolen; du sautst opp däm Troon. Du best jerajcht wan du rechst.

⁶Du hast de Velkja jeschullen. Du hast de gottloose omjebrocht. Du hast äaren Nomen opp emma un emma äwatsied jebrocht.

⁷Met de Fiend es opp emma oppjeriemt worden. Gott haft june Städa en de Grunt jebrocht, soo daut niemols mea aun dee jedocht woat.

⁸De HAR oba blift eewich Kjennich; hee haft sienen Troon reedjemoakt toom rechten.

⁹Hee woat de Welt rajcht rechten, un aule Velkja opprechtich rejieren.

¹⁰De HAR nemt de oame un unjadrekjte unja Schutz. Hee es een Schutz en aul äaren Trubbel.

¹¹Un dee, dee dienen Nomen kjanen, woaren äa vetruen opp die saten, wiels du, HAR, hast dee noch niemols em Stäakj jeloten, dee no die sieekjen.

¹²Loft dän HARN, dee en Zion wont. Sajcht de Velkja, waut hee jedonen haft.

¹³Hee, dee doa Rach eewen deit, haft nich de sienje vejäten. Hee vejat daut nich wan de oame schrieen.

¹⁴Hab Metleet met mie! See emol waut miene Fiend mie fa Älent toosaten, oo HAR, rad mie ut de Doodespuat rut,

¹⁵daut ekj aul daut vetalen kaun, wuafäa ekj die low, un daut ekj aun de Puat von Jerusalem stonen kaun un mie freien, daut du mie jerat hast.

¹⁶De Velkja sent en dän Growen vesunken, dän see jegroft hauden. En daut Nat, daut see aundre jestalt hauden, schlenjden see äaren ieejnen Foot.

¹⁷De HAR es aun siene jerajchte Jerechten to kjanen. De gottloose haben sikj en daut faustjerant, waut äare ieejne Henj jedonen haben.

¹⁸De gottloose un aule Velkja, dee Gott vejäten, sellen en daut Doodenrikj nenjebrocht woaren,

¹⁹wiels hee woat de oame nich gaunz vejäten, un de betrofne äare Hopninj woat nich eewich veloaren sennen.

²⁰HAR, sto opp! Lot de Menschen nich de Äwahaunt haben; lot de Velkja ver die jerecht woaren.

²¹HAR, lot äwa de Velkja eene Forcht komen, daut see selfst enseenen, daut see mau Menschen sent.