Read Plautdietsch (Low German) – De Bibel Psalmen 90 Bible Online

Psalmen 90 - Plautdietsch (Low German) – De Bibel bible

Psalmen 90

¹Dän Gottesmaun, Moses, sien Jebäd. Har, du best emmawajch onse Tooflucht.

²Ea de Boaj verendach jebrocht worden, ooda ea du de Ieed un de Welt häastalsd, best du Gott en aule Eewichkjeit.

³Du, dee de Menschen stoawen latst un sajchst: Komt wada Menschenkjinja!

⁴Wiels 1.000 Joa sent bie die soo aus de jistasche Dach, dee vegonen es, ooda soolang aus een Nachtwajchta woakt.

⁵Du fäachst de Menschen wajch aus en een Stroom; dee sent aus een Droom em Schlop. Zemorjes sent dee aus Graus daut fresch utlat;

⁶zemorjes es daut jalsta un waust, un zeowes vewalkjt un vedrieecht daut.

⁷Daut moakt dien Oaja, daut wie soo omkomen, un diene Wutt, daut wie plazlich wajch motten.

⁸Du hast onse Gottloosichkjeiten un onse jeheeme Sinden ver die jestalt, soo daut du dee seenen kaust.

⁹Wie haben onse Läwestiet unja dien Oaja jeläft; wie schluten ons Läwen auf met een Jestän.

¹⁰Ons Läwen es hia 70 Joa, un wan daut huach kjemt, 80, un wan daut uk scheen jewast es, hab wie doch bloos von Mieej un Trua to räden; daut kjemt boolt to Enj un wie flieejen wajch.

¹¹Wäa weet, waut dien Oaja utrechten kaun? Wiels diene Wutt es soo groot aus de Forcht, dee die traft.

¹²Lia ons bedenkjen, daut wie stoawen motten, daut wie kluak woaren.

¹³Oo HAR! Woo lang noch? Drei die doch trigj no ons un hab Metleet met diene Deena!

¹⁴HAR, jeff ons aul tiedich diene truhoatje Leew. Dan well wie die lowen un ons Läwenlank froo sennen.

¹⁵Moak ons nu krakjt soo lang froo aus du ons jeploacht hast, doano aus wie Joaren Ojjlekj jeläden haben.

¹⁶Lot diene Deena un äare Kjinja diene Woakjen un diene Harlichkjeit seenen.

¹⁷Mucht de Har, ons Gott, emma leeftolich to ons sennen, un daut Woakj daut wie doonen verwoats komen loten. Jo, lot onse Oabeit verwoats komen.