Read Plautdietsch (Low German) – De Bibel Psalmen 91 Bible Online

Psalmen 91 - Plautdietsch (Low German) – De Bibel bible

Psalmen 91

¹Wäa bie dän Aulahechsten em Schulinj wont, woat sikj bie dän Aulmajchtjen em Schauten vereiwen.

²Dee woat toom HARN sajen: Du best miene Tooflucht un miene vesechade Staut, mien Gott opp dän ekj mie velot.

³Hee woat die secha ut dän Jäaja siene Schlenj rutraden un uk ut de jefäadelje Pestilenz.

⁴Hee woat sikj die unja de Flichten nämen, un doarunja woascht du emma secha sennen. Daut hee soo tru es, es aus een Schorm un Schilt.

⁵Du woascht nich Angst haben, daut de Nacht waut schrakjeljet passieren woat, ooda fa de Feilen, dee äwadach flieejen,

⁶uk nich fa de Pestilenz, dee sikj em Diestren romschlikjt, ooda fa de Ploagen, dee medden em Dach ombrinjen.

⁷Wan bie die uk 1.000 aun eene Sied faulen un 10.000 aun de rajchte Sied, oba daut saul die nich dicht bie komen.

⁸Du woascht bloos kjikjen un met diene Uagen seenen, woo de gottloose jestroft woaren.

⁹Wiels du die dän HARN, dän Aulahechsten, aus Woninj jewält hast,

¹⁰woat äwa die kjeen Schoden komen, un bie diene Woninj woat kjeene Ploag dicht bie komen.

¹¹Wiels hee haft siene Enjel jesajcht äwa die to sennen, un die opp aul diene Wäaj to bewoaren.

¹²Dee woaren die opp de Henj droagen, daut du die de Feet nich aun de Steena statst.

¹³Du woascht opp däm Leiw un opp de Schlang stieen kjennen, un opp junge Leiws un Droaken met de Feet romklunjen.

¹⁴Wiels hee mie goot es, sajcht de HAR, woa ekj am uthalpen. Wiels hee mienen Nomen kjant, woa ekj am bewoaren.

¹⁵Hee woat mie aunroopen un ekj woa am auntwuaten. Ekj woa am em Trubbel biestonen; ekj woa am raden un to Ieren brinjen.

¹⁶Ekj woa am met een langet Läwen tofräd stalen, un am miene Radunk seenen loten.