Read Plautdietsch (Low German) – De Bibel Psalmen 92 Bible Online

Psalmen 92 - Plautdietsch (Low German) – De Bibel bible

Psalmen 92

¹Een Psalmleet fa däm Sabat.

²Daut es goot dän HARN to danken un met Leeda dienen Nomen to lowen, du Aulahechsta,

³Zemorjes räd wie von woo truhoatich leeftolich du best, un zeowes saj wie, woo wie ons opp die veloten kjennen.

⁴Wie lowen die met daut tieen seidje Instrument, un spälen met Hoapen un Jittoaren.

⁵HAR, du hast mie derch diene Woakjen froo jemoakt, un ekj sinj met Freid von dien Hauntwoakj.

⁶Oo HAR, woo groot sent doch diene Woakjen, un diene Jedanken sent soo sea deep.

⁷Wäa nich weis es, jleeft daut nich, un een Noa vesteit daut nich,

⁸daut wan de gottloose uk jreenen aus Graus, un de Sinda aula blieejen, daut dee woaren opp emma äwatsied jebrocht woaren.

⁹Oba du, oo HAR, best eewich de aula Hechsta.

¹⁰Dan kjikj emol, diene Fiend, oo HAR, kjikj emol, diene Fiend motten omkomen un aule schlajchte vestreit woaren.

¹¹Oba du hast mie soo stoakj jemoakt aus een willen Boll, un hast mie Freideneelj äwajegoten.

¹²Miene Uagen haben jeseenen woo miene Fiend jefollen sent. Miene Uaren hieren woo de schlajchte, dee sikj jäajen mie saten, to Grunt gonen.

¹³De jerajchte woaren jreenen aus een Paulmboom; dee woaren soo waussen aus een Zeedaboom opp däm Libanon.

¹⁴Dee sent em HARN sien Hus jeplaunt, un woaren en Gott siene Väahäw jreenen.

¹⁵Dee woaren noch en de oole Joaren Frucht droagen, un woaren fresch un em blieejen bliewen.

¹⁶Doaraun es to seenen, daut de HAR jerajcht un opprechtich es; bie am sto ekj secha, un en am es nuscht ojjerajchtet.