Read Plautdietsch (Low German) – De Bibel Psalmen 94 Bible Online

Psalmen 94 - Plautdietsch (Low German) – De Bibel bible

Psalmen 94

¹Oo HAR Gott, du Racheewa, oo Gott, dee du Rach eewen deist, komm verendach!

²Sto du Weltrechta opp, un tol de stolte trigj, waut see vedeent haben!

³Woo lang woaren de gottloose, oo HAR, woo lang woaren de gottloose prolen?

⁴Dee räden stolte Wieed; aul dee, waut Jewault eewen puchen met sikj selfst.

⁵Dee klunjen opp dien Volkj rom un ploagen dien ieejnet Volkj.

⁶De Wätfrues un de framde brinjen see om, un de Weisen moaken see doot.

⁷See sajen: De HAR sitt daut nich, un Jakob sien Gott kjemmat sikj nich doarom, waut wie met an doonen.

⁸Denkjt emol doaräwa no, jie Noaren em Volkj; wanea woa jie to Besennunk komen?

⁹Sull dee, dee daut Ua jeschaufen haft, nich uk hieren? Deit dee, dee daut Uag jeschaufen haft, nich seenen?

¹⁰Deit dee, dee de Velkja belieet, junt nich strofen? Fält däm, dee aundre lieet, daut selfst aun Erkjantnis?

¹¹De HAR weet, waut Menschen denkjen! Hee weet, woo nuzloos daut es.

¹²Jesäajent es dee Maun dän du strofst, un derch dien Jesaz belieren deist;

¹³daut du am Ru jefst un utem Trubbel ratst, bat fa de gottloose een Grauf jegroft es.

¹⁴Wiels de HAR woat sien Volkj nich vesteeten un sien ieejen Volkj niemols veloten.

¹⁵Wiels Jerecht woat wada opp Jerajchtichkjeit stonen, un wäa von Hoaten opprechtich es, woat sikj doatoo freien.

¹⁶Wäa steit fa mie un jäajen de gottloose? Wäa steit fa mie un jäajen de onjehuarsome?

¹⁷Wan de HAR mie nich jeholpen haud, wudd miene Seel boolt haben em stellen Grauf jeläajen.

¹⁸Aus ekj säd: Mie jleppen de Feet, dan hilt diene truhoatje Leew, oo HAR, mie opprajcht.

¹⁹Aus ekj ennalich sea beduat wia, freid miene Seel sikj to dienen Troost.

²⁰HAR, sust du irjentwaut to doonen haben met gottloose Harschoften, dee daut Jesaz brucken toom daut schlajchte to rajchtfoadjen?

²¹See baunen sikj toop jäajen de jerajchte, un vedaumen de oschuldje toom Doot.

²²Oba de HAR es miene vesechade Staut jeworden, un mien Gott aus een Steen, hinja dän ekj secha sie.

²³Hee woat an fa äare Ojjerajchtichkjeit strofen, un fa äare Sinden ombrinjen; de HAR, ons Gott, woat dee äwatsied brinjen.