Read Plautdietsch (Low German) – De Bibel Psalmen 95 Bible Online

Psalmen 95 - Plautdietsch (Low German) – De Bibel bible

Psalmen 95

¹Komt, well wie met Leeda dän HARN lowen, un ut Freid juchen un onsen HARN lowen, dee ons rat un secha helt.

²Well wie dankent ver am komen un am met Jesank un Musikj ieren.

³Wiels de HAR es de groota Gott, de groota Kjennich äwa aule Jetta.

⁴En siene Haunt es aules, waut unjen en de Ieed es, un de Boaj bat en de hechste Spetzen sent uk siene.

⁵Daut Mäa es uk sient, wiels hee muak daut, un siene Henj haben uk daut drieeje Launt jeschaufen.

⁶Komt, well wie am aunbäden un ver am kjneeen un hanfaulen ver däm HARN, dee ons jemoakt haft.

⁷Wiels hee es ons Gott, un wie daut Volkj opp siene Weid un de Schop fa dee hee sorcht. Wan jie vondoag siene Stemm hieren,

⁸dan vehoat june Hoaten nich, soo aus bie Meriba passieed, bie Massa en de Wiltnis,

⁹wua june Vodasch mie vesochten un opp de Proow stalden, wan see miene Woakjen uk aul jeseenen hauden.

¹⁰Dit Volkj es mie 40 Joa jäajenaun jewast, soo daut ekj säd: Daut es een Volkj, dee em Hoat erren un miene Wäaj nich lieren wellen.

¹¹Doawäajen schwua ekj en mienem Oaja, daut see nich en miene Ru Städ nenn komen sellen, dee ekj an vesproaken haud.