Read Plautdietsch (Low German) – De Bibel Psalmen 96 Bible Online

Psalmen 96 - Plautdietsch (Low German) – De Bibel bible

Psalmen 96

¹Sinjt däm HARN een nieet Leet väa; sinjt fa dän HARN, de gaunze Welt.

²Sinjt fa dän HARN un loft sienen Nomen. Rät aule Dach von woo hee raden deit.

³Vetalt aule Velkja von siene Harlichkjeit un von siene Wundawoakjen.

⁴Wiels de HAR es groot un lowenswieet. Hee sull mea jefercht woaren aus aule Jetta.

⁵Wiels de Velkja äare Jetta sent aules Aufjetta, oba de HAR haft dän Himmel jemoakt.

⁶Pracht un Harlichkjeit sent ver am; Krauft uk Scheenheit fellen sien Heilichtum.

⁷Jie Menschenkjinja ut aule Velkja, schrieft dän HARN Iea un Jewault too.

⁸Schrieft dän HARN de Harlichkjeit too, dee sienen Nomen traft. Komt met Opfa en sienen Väahoff.

⁹Doot dän heiljen HARN en aule Scheenheit aunbäden. De gaunze Welt, fercht dän HARN.

¹⁰Sajcht to aule Velkja, daut de HAR Kjennich es, un daut de Welt, dee hee jeschaufen haft, fauststonen deit, un daut hee de Velkja rajcht rechten woat.

¹¹Lot dän Himmel sikj freien un de Ieed froo sennen; lot daut Mäa ruzhen met aules waut doabennen es.

¹²Lot de Stapen un waut doabowen es sikj freien. Dan woaren aule Beem en de Welda met Freiden juchen.

¹³Dee woaren ver däm HARN sinjen, wiels hee kjemt, hee kjemt de Ieed to rechten. Hee woat de Welt jerajcht rechten, un de Velkja, soo aus hee daut rajcht sitt.