Read Plautdietsch (Low German) – De Bibel Psalmen 98 Bible Online

Psalmen 98 - Plautdietsch (Low German) – De Bibel bible

Psalmen 98

¹Sinjt däm HARN een nieet Leet väa, wiels hee deit Wunda; hee haft derch siene rajchte Haunt un sien heiljen Oarm äwa aul siene Fiend jewonnen.

²De HAR haft ons jewäsen, woo hee raden kaun, hee haft de Velkja daut kloa jemoakt, daut hee jerajcht es.

³Hee bewees Israel wada, woo truhoatich un leeftolich hee Frieejoa to an jewast wia. De gaunze Welt haft jeseenen, woo hee raden deit.

⁴Lot de gaunze Welt äwa däm HARN juchen; stemt een scheenet Leet aun, un loft am.

⁵Loft dän HARN met Hoapenspell, met Instrumenten un sinjen;

⁶met Drommeln un Trompeeten bewiest dän HARN un Kjennich june Freid.

⁷Lot daut Mäa ruzhen un aules waut doabennen es, de Ieedboddem un dee doabowen wonen.

⁸Lot de Riefasch met de Henj klautschen. Lot de Boaj met Freiden toop sinjen.

⁹Lot dee ver däm HARN sinjen, wiels hee kjemt de Ieed to rechten. Hee woat de Welt jerajcht rechten, un de Velkja soo aus daut rajcht es.