Read Plautdietsch (Low German) – De Bibel Psalmen 99 Bible Online

Psalmen 99 - Plautdietsch (Low German) – De Bibel bible

Psalmen 99

¹De HAR es Kjennich, doawäajen zetren de Velkja; hee sett tweschen de Cheruben, doawäajen bewäacht sikj de Ieed.

²De HAR es groot en Zion un huach äwa aule Velkja.

³Lot an dän HARN sien grooten wundaboaren Nomen lowen; hee es heilich.

⁴De stoakja Kjennich es doaropp ut, rajcht to schaufen. Du moakst fromm! Du hast fa Israel jeschaufen, waut jerajcht un rajcht es.

⁵Ieet dän HARN onsen Gott, un bät am aun ver siene Footbenkj, wiels hee es heilich.

⁶Moses un Aaron wieren mank siene Priesta, un Samuel wia mank dee, dee sienen Nomen aunroopten; dee roopten dän HARN aun, un hee auntwuad an.

⁷Hee räd to an derch een Wolkjenstenda, un see hilden siene Jesazen un Ordnungen, dee hee an jeef.

⁸Du, HAR ons Gott, jeefst an eene Auntwuat. Du wieescht fa Israel een Gott, dee an vejeef, oba dee daut orrajcht stroft.

⁹Loft dän HARN onsen Gott, un bät am aun bie sienen heiljen Boajch. Wiels de HAR ons Gott es heilich.