Read Plautdietsch (Low German) – De Bibel Spricha 12 Bible Online

Spricha 12 - Plautdietsch (Low German) – De Bibel bible

Spricha 12

¹Wäa sikj wellich belieren lat, woat kluak woaren, wäa nich well Lia aunnämen, blift schoslich.

²Eenen gooden Maun lat de HAR goodet tookomen, oba hee vedaumt dee, dee schlajcht sent.

³Derch gottloos sennen, kjemt eena nich opp fausten Grunt, oba eenen jerajchten siene Wartlen sent faust.

⁴Eene goode Fru es eene Kroon fa äaren Maun, oba eene dee am schaund moakt, es soo aus vefulde Knoakes.

⁵Waut de jerajchte plonen, es opprechtich, oba aun de ojjerajchte äa Rot schmäat eena sikj aun.

⁶Menschen woaren omjebrocht derch waut de ojjerajchte sajen, oba waut de jerajchte räden, rat an.

⁷De gottloose woaren omjeschmäten un sent wajch, oba de jerajchte bliewen met Famielje toop stonen.

⁸Een Maun woat doano jeloft aus hee weis es, oba Menschen met vedreide Jedanken woaren toschaund.

⁹De jeweenelja Mensch met een Oabeida es bäta auf, aus dee wäa väajeft groot to sennen un nich to äten haft.

¹⁰Een jerajchta erboarmt sikj uk äwa sien Vee, oba de ojjerajchta es ommenschlich wan hee uk aul well veninftich sennen.

¹¹Wäa sien Launt beoabeit, woat jenuach Broot haben; wäa no onnuzboare Dinja sträft, brukt nich sienen Vestaunt.

¹²De ojjerajchte freien sikj aun Schoden doonen, oba de jerajchte wartlen sikj en un waussen.

¹³De beese ranen sikj faust en äare ieejne faulsche Wieed, oba de jerajchte woaren veschoont vom Trubbel.

¹⁴Wäa goodet rät, kjemt väl goodet too; eena vedeent doano aus eena met de Henj schauft.

¹⁵Een Schosel sitt siene Wäaj emma aus rajcht; wäa oba Rot aunnemt, dee es weis.

¹⁶Een Schosel wiest sienen Oaja boolt, wäa oba Beleidjunk äwasitt, es kluak.

¹⁷Wäa de Woarheit rät, es een gooda Zeij; een faulscha Zeij rät Läajes.

¹⁸Onväasechtje Wieed spekjen aus een Schwieet, oba de Weise räden heelsome Wieed.

¹⁹Opprechtje Leppen bestonen opp emma, oba eene faulsche Tung besteit nich lang.

²⁰Wäa beeset plont, haft een faulschet Hoat, oba wäa Fräd moaken deit, brinjt Freid.

²¹Däm jerajchten traft kjeen Ojjlekj, oba de gottloose kjrieen äare volle Mot doavon.

²²Faulsche Miela sent däm HARN jäajenaun; am jefaulen dee, dee tru haundlen.

²³Een vestendja Maun sajcht nich aules waut hee weet, een Schosel prolt met siene Dommheit.

²⁴Wäa flietje Henj haft, woat rejieren, oba däm Fulenza siene Henj motten Sklowenoabeit doonen.

²⁵Wäa em Hoat beduat es, haft daut schwoa, oba wäa jetreest woat, freit sikj.

²⁶De jerajchta wält siene Frind väasechtich, oba de ojjerajchte äa Wajch veleit eenem.

²⁷Een Fulpelz reet nich emol sienen Broden wan hee jejäajat haft; oba een flietja Maun freit sikj to daut, waut hee haft.

²⁸Jerajcht sennen brinjt Läwen, oba schlajcht sennen fieet nom Doot.