Read Plautdietsch (Low German) – De Bibel Spricha 13 Bible Online

Spricha 13 - Plautdietsch (Low German) – De Bibel bible

Spricha 13

¹Een weisa Sän lat sikj von sienen Voda belieren, oba een Spetta horcht no kjeen belieren.

²Wäa goodet rät, kjricht uk goodet trigj; wäa onopprechtich es, brinjt vebräakjen un kjwälen.

³Wäa äwa sien Mul woakt, bewoat sien Läwen; wäa oba grootmulich omhäa es, brinjt sikj selfst en de Grunt.

⁴Däm Fulen jankat väl un kjricht daut oba nich, oba de flietje kjrieen mea aus jenuach.

⁵Opprechtje Menschen es daut lieejen jäajenaun; de gottloose moaken sikj selfst toschaund.

⁶De opprechtja finjt Schutz en jerajcht sennen, oba de Sinda vedoaft sien Läwen met schlajchtet doonen.

⁷Eenje jäwen väa, daut see rikj sent un haben oba nuscht; aundre vetalen woo oam see sent, un sent oba sea rikj.

⁸Wäa rikj es, kaun doamet sien Läwen raden, oba de oama woat nich jedreift.

⁹De jerajchte äa Licht schient kloa, oba de gottloose äa Licht woat utgonen.

¹⁰Stolte Menschen strieden sikj emma, oba de Weise nämen Rot aun.

¹¹Onopprechtjet Jelt veschwinjt leicht; wäa daut oba Stekjwies vedeent, bie däm woat daut waussen.

¹²Eene Hopninj dee sikj vetrakjt, moakt eenem krank; wan daut oba kjemt, waut eena haben mucht, es daut een Läwensboom.

¹³Wäa de Belierunk veacht, dee woat doarunja lieden; wäa een Jeboot schazt, däm kjemt daut goot ut.

¹⁴Waut de Weise lieren es eene Läwenskjwal, daut rat däm Mensch von de Doodesschlenj.

¹⁵Wäa väl vesteit, woat väl jeräakjent, wäa nich bestendich es, haft daut schwoa.

¹⁶Een kluaka deit aules met Weisheit, oba een Noa brinjt mea Dommheit verendach.

¹⁷Een beesa Norechta kjemt em Trubbel, oba dee Norechta, opp däm to veloten es, brinjt Fräd.

¹⁸Wäa sikj nich belieren lat, brinjt sikj en Schaund un Oamoot; wäa sikj belieren lat, woat jeieet.

¹⁹Daut kjrieen, waut eena jieren haben mucht, jeit sea scheen. Een Noa wäat sikj daut beese toch to loten.

²⁰Wäa daut met weise Menschen helt, woat weis, oba wäa met Noaren vekjieet, woat Schoden lieden.

²¹Ojjlekj es de Sinda hinjaraun, oba de jerajchte sellen met goodet beloont woaren.

²²Een gooda Maun lat waut fa siene Kjinja un Grootkjinja, oba de Sinda äa Goot woat fa de jerajchte jehoolen.

²³Wan däm oamen Maun sien Launt uk eene groote Arnt jebrocht haft, velist hee daut wan nich jerajcht jehaundelt woat.

²⁴Wäa dän Stock nich brukt, haft nuscht äwrich fa sienen Sän, oba wäa sienen Sän goot es, woat am väasechtich belieren.

²⁵De jerajchte äten daut see scheen saut woaren; de gottloose oba kjrieen nich jenuach.