Read Plautdietsch (Low German) – De Bibel Spricha 17 Bible Online

Spricha 17 - Plautdietsch (Low German) – De Bibel bible

Spricha 17

¹Daut es bäta em Fräd drieejet Broot äten, aus een jeschlachtet met Striet un Zank.

²Een weisa Kjnajcht woat äwa eenen Sän jebeeden dee sikj toschaund moakt, un woat mank de Breeda een Oafgoot kjrieen.

³Golt un Selwa woaren derch daut Fia jeschekjt toom seenen woo rein daut es, un soo unjasieekjt de HAR daut Menschenhoat.

⁴Een gottloosa horcht no vekjieede Räden; een Lieeja horcht jieren no niedatrajchtje Wieed.

⁵Wäa äwa eenen oamen spott, veacht dän dee am jemoakt haft, un wäa sikj äwa eenen aundren sien Ojjlekj freit, woat nich onbestroft bliewen.

⁶De oole äare Kroonen sent äare Grootkjinja, un de Kjinja äare Iea es äare Elren.

⁷Huach jeachte Räd steit eenen Noa nich aun, un wooväl weinja daut een Leida Läajes rät.

⁸Bekjeepen wirkjt soo aus Hakjsarie; doamet jeit irjentwaut uttorechten.

⁹Wäa eene Veschuldjunk vejeft, sträft no Leew; wäa daut oba emma wada opprieet, drift goode Frind uteneen.

¹⁰Eenen vestendjen schellen halpt mea aus hundat Schläaj opp eenen Noa.

¹¹Een schlajchta Mensch es bloos doaropp ut wadaspanstich to sennen, doawäajen woat am een grollenda jeschekjta bejäajnen.

¹²Daut es bäta eene Boarenkoo, dee de junge wajchjenomen sent, to bejäajnen, aus eenen Schosel en siene Dommheit.

¹³Wäa goodet met beeset trigjtolt, woat daut beese niemols utem Hus looswoaren.

¹⁴Zank aunfangen es soo aus aum Wota dän Daum derchgrowen, doawäajen moakt Fräd ea doa Zank utbrakjt.

¹⁵Wäa dän gottloosen rajchtfoadicht un dän jerajchten vedaumt, dee kaun de HAR beid nich vedroagen.

¹⁶Waut halpt eenen Noa waut Jelt toom Weisheit kjeepen, wan hee kjeen velangen doano haft.

¹⁷Een Frint woat emma Leew bewiesen, un een Brooda es jebuaren toom em Trubbel biestonen.

¹⁸Bloos een Maun, dee nich weet waut to eene Sach jehieet, wudd eenen aundrem de Haunt jäwen un vespräakjen siene Schult to betolen.

¹⁹Wäm daut Zanken scheen jeit, sindicht jieren. Wäa siene Puaten huach but, lot doamet de Vebräakja en.

²⁰Een Maun, met een vekjieedet Hoat, kjemt nich verwoats, un wäa eene vekjieede Tung haft, felt em Ojjlekj.

²¹Wäa eenen Noa toom Kjint haft, haft Trua; un eenen Noa sien Voda haft kjeene Freid.

²²Een frooet Hoat deit krakjt soo väl goot aus Medizien, oba eenen bedrekjten vedrieejen de Knoakes.

²³Een gottloosa nemt jieren heemlich Jeschenkja, om dän jerajchten Wajch to vedreien.

²⁴Wäa vestendich es, sträft no Weisheit, oba eenen Noa siene Uagen waundren äwa de gaunze Welt, un hee haft kjeen Ziel.

²⁵Een schoselja Sän moakt sienen Voda truarich, un moakt daut betta fa ar, dee am jebuaren haft.

²⁶Daut es nich goot wan eena, dee nich orrajcht jedonen haft, mott Strof betolen, un daut es nich rajcht, wan eena dee huach aunjeseenen es, vepriejelt woat.

²⁷Wäa weis es, es spoasom met siene Wieed, un wäa vestendich es, haft eenen rujen Jeist.

²⁸Soogoa een Noa woat aus weis aunjeseenen, wan hee lieet stell to sennen; wan hee sien Mul toohelt, woat hee aus vestendich aunjeseenen.