Read Plautdietsch (Low German) – De Bibel Spricha 18 Bible Online

Spricha 18 - Plautdietsch (Low German) – De Bibel bible

Spricha 18

¹Wäa sikj von aundre aufsondat, intressieet sikj bloos fa sikj selfst; dee sent emma jäajen daut, waut aulemaun weet, daut et rajcht es.

²Een Noa haft kjeene Freid aun waut vestonen lieren; dee haft bloos Lost to wiesen, waut hee weet.

³Sind un Schaund gonen toop; velia diene Iea un du woascht en dee Städ veacht woaren.

⁴Wieed en eenen Maun sien Mul sent soo aus deepet Wota, un eene Weisheitskjwal es soo aus een volla Stroom.

⁵Daut es nich rajcht opp eenen gottloosen siene Sied to sennen, un däm jerajchten sien rajcht auftosajen.

⁶Een Noa siene Räden rechten Zank aun, un siene Wieed vedeenen priejel.

⁷Een Noa siene Räden brinjen am en de Grunt, un siene Leppen schlenjen siene ieejne Seel.

⁸Een Pludasak siene Wieed sent aus scheenet Äten; dee äten eenen Mensch gaunz opp.

⁹Wäa too ful es toom oabeiden, es de Brooda to däm dee en de Grunt brinjt.

¹⁰Däm HARN sien Nomen es een stoakja Torm; de jerajchte ranen doahan un sent secha.

¹¹Fa dän rikjen Maun es sien Goot aus siene sechre Staut; hee denkjt sikj, daut es ommäajlich äwa de Waunt to komen, am fausttonämen.

¹²Ea een Maun felt, woat hee em Hoat stolt, un ea hee to Ieren kjemt, mott hee läach to stonen komen.

¹³Wäa doa auntwuat ea hee horcht, dee moakt sikj aus een Noa toschaund.

¹⁴Een Maun sien Jeist helt am opprajcht em lieden, oba wäa kaun met eenen bedrekjten läwen?

¹⁵Een kluaka Maun saumelt Weisheit, un däm Weisen siene Uaren sieekjen doano.

¹⁶Een Maun dee een Jeschenkj jeft, moakt Rum fa sikj; daut brinjt am ver de groote to stonen.

¹⁷Daut sitt emma soo aus wan de ieeschta, dee siene Sach väastalt, rajcht es, bat een aundra kjemt un Froagen stalt.

¹⁸Daut Loss trakjen stelt dän Striet, un helt stoakje Jäajna uteneen.

¹⁹Een vezoajda Brooda es schwanda to jewennen aus eene vesechade Staut, un Zank helt dee uteneen aus een met Stangen veräajeldet Paulaust Puat.

²⁰Een Maun woat voll von daut waut hee sajcht, un mott läwen met waut siene Leppen jerät haben.

²¹De Tung haft de Jewault äwa Doot un Läwen, un wäa jieren rät, woat met äare Frucht läwen.

²²Wäa eene Fru finjt, finjt waut goodet, un es vom HARN jesäajent.

²³Een oama prachat om Jnod, oba de rikja jeft eene ruche Auntwuat.

²⁴Eenje Frind halpen nuscht, oba doa es een Frint dee fausta biesteit aus een Brooda.