Read Plautdietsch (Low German) – De Bibel Spricha 2 Bible Online

Spricha 2 - Plautdietsch (Low German) – De Bibel bible

Spricha 2

¹Mien Kjint, nemm miene Lia aun, un hool miene Jebooten aus eenen Schauz en die.

²Horch goot, no waut weis es, un bemieej die daut to vestonen.

³Wan du no Ensecht frajchst, un om Vestentnis bätst,

⁴wan du doano sieekjst aus no Selwa, un doano romforschst aus no eenen vestoaknen Schauz,

⁵dan woascht du lieren däm HARN to ferchten, un woascht Gotteserkjantnis finjen.

⁶De HAR jeft Weisheit; waut de HAR rät brinjt Erkjantnis un Vestentnis.

⁷Hee jeft de Opprechtje woare Weisheit; hee es een Schilt fa dee, dee opprechtich waundlen.

⁸Hee woakt äwa dee, dee daut rajchte doonen, un helt dee secha, dee tru to am sent.

⁹Dan woa jie daut jerajcht sennen, nom rajcht seenen, fromm sennen un aule goode Wäaj vestonen.

¹⁰Wan die de Weisheit en daut Hoat kjemt, un diene Seel eene Freid aun Erkjantnis lieren haft,

¹¹woat de Väasecht die bewoaren, un dien Vestaunt woat die doabie hoolen.

¹²Daut woat die halpen von beeset Läwen wajch to bliewen, un uk von däm Maun, dee vekjieede Dinja rät,

¹³von dee, dee dän opprechtjen Wajch veloten un de diestre Errwäaj nogonen.

¹⁴Dee freien sikj to äa frajchet Läwen, dee gonen beese un vekjieede Sachen no

¹⁵un sent kromm un hinjalestich.

¹⁶Weisheit bewoat von de Ehebräakjarin, un de framde Fru äa glautmuljet schmeichlen,

¹⁷eene dee äaren jugentlichen Kommarod velat, un äaren Bunt met Gott vejäten haft.

¹⁸Wäa no äa Hus jeit, finjt dän Doot; äare Jenj fieren toom Doot.

¹⁹Dee, dee doahan gonen, komen niemols trigj, un komen uk nich trigj opp dän Läwenswajch nopp.

²⁰Soo kaust du met goode Menschen opp eenen Wajch gonen, un een Läwen fieren daut jerajcht es.

²¹De Opprechtje woaren en daut Launt wonen, un de fromme woaren doabennen bliewen.

²²Oba de gottloose woaren äa Launt velieren, un de hinjalestje woaren von doa utjerot woaren.