Read Plautdietsch (Low German) – De Bibel Spricha 26 Bible Online

Spricha 26 - Plautdietsch (Low German) – De Bibel bible

Spricha 26

¹Soo aus de Schnee em Somma un de Räajen em Eifst, soo es daut uk nich aum Plauz eenen Noa to ieren.

²Soo aus een flauterndet Spoalinkj ooda een flieejendet Schwaulem, soo sat sikj uk een onvedeenda Fluch nich.

³Eene Wipp fa een Pieet, eenen Toom fa eenen Äsel, un eenen Stock fa eenen Noa sienen Rigjen!

⁴Auntwuat eenen Noa nich krakjt soo schoslich aus hee rät, daut du nich krakjt soo best aus hee es.

⁵Auntwuat eenen Noa doano aus hee schoslich es, sest kjemt hee sikj selfst weis väa.

⁶Wäa derch Noarenhaunt eene Norecht schekjt, schoont siene ieejne Feet. Dee, dee de Norecht kjricht, mach die Schoden aundoonen, wiels am de Norecht oajat, un dan haft am daut nuscht jeholpen siene Feet schoonen.

⁷Soo aus eenen lomen Maun de Feet schlaup henjen, soo es een Sprechwuat en eenen Noa sien Mul.

⁸Een Noa to ieren haft nuscht mea Senn aus dän Steen en de Schlenj aunbinjen.

⁹Soo aus een Stachel en eenen bedrunknen siene Haunt, soo es een Sprechwuat en eenen Noa sien Mul.

¹⁰Soo aus een Boagenscheeta, dee aulem vewunden deit, es dee, dee eenen Noa, ooda eenen dee toofalich vebie jeit, meeden deit.

¹¹Soo aus een Hunt sien utjespäajnet wada frat, soo deit een Noa siene Dommheit emma wada.

¹²Doa es mea Hopninj fa eenen Noa, aus fa däm dee sikj selfst weis väakjemt.

¹³Een Schladonz sajcht: “Doa es een Leiw opp däm Wajch, un een rietenda Leiw opp de Gaussen.”

¹⁴Soo aus eene Däa sikj en de Jehenjen dreit, soo dreit de Fulpelz sikj em Bad.

¹⁵Een Fulpelz stakjt siene Haunt en de Schiew, oba es dan too ful dee nom Mul to brinjen.

¹⁶De Fula es en siene ieejne Uagen weisa aus säwen Mana dee aunstendich auntwuaten.

¹⁷Soo aus eena dee eenen framden Hunt aun de Uaren dreit, es dee, dee vebie jeit un sikj mank aundre äa Jestried aufjeft.

¹⁸Soo aus een Wonsennja met brennende Feilen Menschen doot scheeten deit,

¹⁹es een Maun dee sienen Noba hinjat Licht fieet un dan sajcht: “Ekj haud bloos Spos!”

²⁰Wan kjeen Holt opp däm Fia jelajcht woat, jeit daut ut, un wua kjeen Pludra es, hieet sikj daut Jezank opp.

²¹Soo aus Kolen daut Gloot un Holt een Fia aum gonen hoolen, soo helt dee, wäa emma zanken well, daut strieden bie.

²²Een Pludra siene Wieed sent soo aus daut scheenste Äten; dee gonen eenen Mensch derch dän gaunzen Kjarpa.

²³Glaute Wieed, dee een beeset Hoat vestäakjen, sent soo aus een ieednet Jefäs met Selwaschum beschmäat.

²⁴Een Fient vestakjt sikj hinja siene Räd; em Hoat es hee hinjalestich.

²⁵Wan hee frintlich rät, jleew am nich, wiels hee haft onbejrieplich väl schudahauftet em Hoat.

²⁶Hee mach sienen Oaja vestäakjen, oba aulemaun woat daut beese seenen daut hee deit.

²⁷Wäa een Loch groft fa aundre nenn to faulen, woat selfst nenn faulen, un wäa eenen Steen rolt eenen aundren toom Schoden, opp dän woat dee trigj nopp rollen.

²⁸Eene Tung dee Läajes rät, veacht däm, däm see wee deit, un een Schmeichelmul brinjt vedoawen.