Read Plautdietsch (Low German) – De Bibel Spricha 27 Bible Online

Spricha 27 - Plautdietsch (Low German) – De Bibel bible

Spricha 27

¹Low nich dän morjeschen Dach, wiels du weetst nich waut vondoag noch passieren kaun.

²Lot eenen aundren die lowen, un nich dien ieejnet Mul, eenen framden un nich diene ieejne Leppen.

³Een Steen es schwoa un Saunt haft eene Wicht, oba eenen Noa sien romjewinkjsch es schwanda aus dee beid.

⁴Wutt es ommenschlich, un Oaja schmitt eenem om, oba wäa kaun jäajen Aufgonst stonen?

⁵Vemonunk ver aulemaun es bäta aus heemliche Leew.

⁶Eenen Frint kaust du vetruen, wan hee die uk wee deit, un opp eenen Fient kaust du die nich veloten, wan hee die uk väl mol kust.

⁷Wäa äwasaut es, däm äakjelt soogoa de Honnich, oba fa eenen hungajen es soogoa daut betre seet.

⁸Soo aus een Voagel, daut sien Nast velat, es een Maun dee sien Hus velat.

⁹Saulweelj un Parfum moaken daut Hoat froo, un soo deit uk een frintelja rotjäwenda Frint.

¹⁰Velot nich dienen Frint uk nich dienen Voda sienen Frint, un go uk nich no dienen Brooda sien Hus wan du Ojjlekj hast, wiels een Noba dicht bie es bäta aus een Brooda wiet auf.

¹¹Mien Sän, sie weis un moak mie daut Hoat froo, dan kaun ekj irjentwäm auntwuaten dee mie veacht.

¹²Een väasechtja Maun sitt daut Ojjlekj komen un brinjt sikj en Sechaheit, oba de onbedochte gonen doa derch, un lieden doafäa.

¹³Wan wäa onbedocht jenuach es un fa eenen framden jebircht haft, dan nemm sien Rock aus een Vespräakjen siene Schult to betolen, uk wan hee daut fa een romdriefschet Frumensch jedonen haft!

¹⁴Wan een Maun sienen Noba tiedich zemorjes lud säajent, nemt de Noba daut aus eenen Fluch en de Städ eenen Säajen.

¹⁵Eene striedaje Fru es soo aus wan daut aun eenen räajnischen Dach biem dreplen blift.

¹⁶Äa opphoolen es soo aus dän Wint opphoolen, ooda soo aus Eelj met de Haunt nämen.

¹⁷Een Massa schoapt daut aundre, soo aus een Maun dän aundren halpt.

¹⁸Wäa eenen Fiejenboom besorcht, at von de Frucht, un wäa sienen Harn bedeent, woat jeieet.

¹⁹Soo aus een Jesecht sikj em Wota spieejelt, soo spieejelt eenen Maun sien Hoat dän Maun.

²⁰Daut Doodenrikj kaun emma mea nämen, un soo sent Menschenuagen niemols tofräd.

²¹De Schmeltgropen toom Selwa un de Owen toom Golt, oba een Maun woat doano jeprooft, waut aundre von am sajen, auf see am lowen ooda nich.

²²Wan du eenen Noa uk met däm Staumpa fien schrooden wurscht aus Jeträajd, kaust du doamet sien Jenoa nich ut am rut kjrieen.

²³See daut du secha weetst, woo daut met diene Schop un Kosen steit, un sie sorjfeltich om diene Häaden.

²⁴Rikjtum blift nich opp emma, un eene Kroon es nich secha vom Voda nom Sän.

²⁵Wan daut Graus aufjeschnäden es un fresch aunfangt to waussen, un daut Fooda opp de Boaj jesaumelt es,

²⁶woaren de Lama die met Kjleeda vesorjen, un de Kosen brinjen Jelt toom mea Launt kjeepen.

²⁷Dan hast uk jenuach Kosenmalkj fa die, fa diene Famielje un diene Deenstmejales.