Read Plautdietsch (Low German) – De Bibel Spricha 29 Bible Online

Spricha 29 - Plautdietsch (Low German) – De Bibel bible

Spricha 29

¹Een Maun dee stieekoppich blift, wan hee belieet woat, woat plazlich omkomen un kjeene Help haben.

²Wan de jerajchte rejieren, freit sikj daut Volkj, oba wan de ojjerajchte rejieren, stänen de Menschen.

³Wäa de Weisheit väl räakjent, moakt sienen Voda froo; wäa oba met Huaren toop läft, brinjt sien Goot en de Grunt.

⁴Derch jerajcht haundlen recht een Kjennich een Launt opp; wäa sikj oba bekjeepen lat, brakjt daut dol.

⁵Wäa eenen Noba schmeichelt, spreet een Nat ut fa däm siene Feet.

⁶Een beesa Mensch veschlenjt sikj en siene ieejne Sind, oba een jerajchta sinjt un freit sikj.

⁷De jerajchte bemieejen sikj de oame rajcht to rechten, oba de gottloose kjemren sikj nich doarom.

⁸Spetta räajen eene Staut opp, oba weise Menschen stellen dän Oaja.

⁹Wan een weisa Maun met eenen Noa toom Jerecht jeit, woat de Noa schempen un tooben; kjeena jewent doa waut bie.

¹⁰Merdasch sent eenen frommen fientlich, un proowen dän Opprechtjen doottomoaken.

¹¹Een Noa jeft sikj sienen Oaja gaunz han, oba een weisa Maun helt sikj trigj.

¹²Wan een Volkjsleida no Läajes horcht, woaren aul siene Deena gottloos woaren.

¹³Oame un rikje haben dit toop, de HAR haft an beid de Uagen opjemoakt.

¹⁴Wan een Kjennich de oame opprechtich recht, woat sien Troon emma secha stonen.

¹⁵De Stock un Vemonunk brinjen Weisheit, oba een Kjint daut sienen ieejnen Wajch haft, brinjt siene Mutta Schaund.

¹⁶Wan de gottloose toonämen, nemt uk de Sind too, oba de jerajchte woaren seenen, woo dee faulen woaren.

¹⁷Belia dienen Sän un dee woat die Fräd jäwen, dee woat diene Seel froo moaken.

¹⁸Wua kjeene Openboarungen von Gott sent, loten Menschen sikj von nuscht trigjhoolen, oba jesäajent es dee wäa daut Jesaz helt.

¹⁹Een Kjnajcht kaun bloos met Wieed nich belieet woaren, wan hee daut uk vesteit, hee nemt sikj daut nich aun. Am mott daut jewäsen uk jelieet woaren.

²⁰Kjanst du eenen Mensch dee doa rät ea hee denkjt? Doa es fa eenen Noa mea Hopninj aus fa soonem.

²¹Wäa eenen Kjnajcht von junk aun bekluckat, woat to goodalatst utfinjen daut hee eenen Sän haft.

²²Een oajalicha Maun recht Striet aun; een hetskopja deit väl sindjen.

²³Eenen Maun sien Stolt brinjt am läach to stonen, een Maun met eenen deemootjen Jeist woat jeieet.

²⁴Wäa eenen Stäla sien Poatna es, stalt sien Läwen oppet Spell, wiels hee stell blift wan daut Jesaz am velangt de Woarheit to räden.

²⁵Menschenforcht to haben brinjt eene Schlenj; wäa sikj opp däm HARN velat, woat secha sennen.

²⁶Väle muchten vom Leida jeholpen woaren, oba bloos de HAR haundelt jerajcht.

²⁷Een ojjerajchta Mensch kaun dän jerajchten nich vedroagen; wäa jerajcht haundelt, kaun de gottloose nich lieden.