Read Plautdietsch (Low German) – De Bibel Spricha 3 Bible Online

Spricha 3 - Plautdietsch (Low German) – De Bibel bible

Spricha 3

¹Mien Kjint, vejat mien Jesaz nich, un hool miene Jebooten met dien gaunzet Hoat;

²dee woaren die een langet Läwen un väl Joaren un Fräd un Jlekj brinjen.

³Lot truhoatje Leew un Woarheit nich von die gonen; henj die dee om daut Jenekj un hool dee em Hoat aus wan dee doljeschräwen sent.

⁴Dan woascht du bie Gott un Menschen goot aunjeseenen sennen un eenen gooden Nomen haben.

⁵Velot die opp däm HARN met dien gaunzet Hoat, un velot die nich opp dien ieejnet Vestaunt.

⁶Denkj aun am en aules waut du deist, un hee woat die dän rajchten Wajch wiesen.

⁷Hool die nich selfst fa weis; fercht däm HARN, un bliew wajch von waut schlajcht es.

⁸Daut woat fa dienen Kjarpa jesunt sennen, un woat diene Knoakes stoakj hoolen.

⁹Iea däm HARN met waut du hast, un opfa am daut ieeschte Poat von aul diene Ennom.

¹⁰Dan woaren diene Spikjasch voll woaren, un diene Wien Krucken woaren äwaranen.

¹¹Mien Kjint, veacht daut nich wan de HAR die belieet, un sie nich ojjeduldich wan hee die vemont;

¹²wäm de HAR goot es, däm belieet hee, soo aus een Voda sien Kjint deit, to däm hee sikj freit.

¹³Woo jesäajent es doch een Mensch dee Weisheit finjt, un een Mensch dee vestendich woat.

¹⁴Weisheit es am mea wieet aus Selwa, un de Jewenst doaderch mea wieet aus Golt.

¹⁵Weisheit es mea wieet aus Parlen, un es nich to vejlikjen met waut du die wenschen machst.

¹⁶En äare rajchte Haunt rieekjt Weisheit langet Läwen han, un en äare linkje Haunt Rikjtum un Iea.

¹⁷Weisheit lieet ons aunjenäme Wäaj to gonen, un aul äare Stiej sent Fräd.

¹⁸See es een Läwen jäwenda Boom fa dee, dee äa aunnämen, un jesäajent sent aul dee, dee sikj aun Weisheit hoolen.

¹⁹Derch Weisheit läd de HAR dän Grunt fa de Ieed, hee vestunt de Himmel aum Plauz to stalen.

²⁰Derch siene Weisheit es de Ieed deep unjen opjebroaken, un de Wolkjen loten dän Deiw faulen.

²¹Mien Kjint, hool die aun de Weisheit, kjikj emma doano daut du Sachen vestonen kaust.

²²Dee woat Läwen fa diene Seel un Straums fa dienen Hauls sennen.

²³Dan woascht du secha dienen Wajch gonen un woascht die nich de Feet steeten.

²⁴Wan du die dolajchst, woascht du die nich enjsten; jo, du woascht die dolajen un ruich schlopen.

²⁵Fercht die nich, daut plazlich waut schrakjeljet komen woat, uk nich wan de gottloose aus een Storm oppkomen.

²⁶Opp däm HARN kaust du die veloten; hee woat doano seenen, daut see die nich faustnämen.

²⁷Hool nich goodet trigj von däm, däm daut traft, wan daut en diene Krauft steit goodet to doonen.

²⁸Saj nich to dienen Noba: “Go un komm trigj; morjen woa ekj die daut jäwen,” wan du daut aul bie die hast.

²⁹Plon nich beeset jäajen dienen Noba, dee em vetruen biesied die wont.

³⁰Stried die nich met wäm onen Uasoak wan hee die nuscht schlajchtet jedonen haft.

³¹Sie nich aufjenstich von eenen dee Jewault brukt, un wäl die kjeene von siene Wäaj;

³²daut es oppscheislich waut de vekjieede Menschen doonen, oba de HAR es de jerajchte sea noaun.

³³Däm gottloosen sien Hus es vom HARN veflucht, oba hee säajent de jerajchte äare Woninj.

³⁴Hee veacht dee, waut veachtlich sent, un es jenstich to dee, waut deemootich sent.

³⁵De Weise woaren Iea kjrieen, oba de Noaren woaren Schaund arnten.