Read Plautdietsch (Low German) – De Bibel Spricha 4 Bible Online

Spricha 4 - Plautdietsch (Low German) – De Bibel bible

Spricha 4

¹Horcht, miene Kjinja, waut jun Voda junt to lieren haft; acht doaropp, daut jie lieren un kluak woaren!

²Ekj jäw junt eene jesunde Lia; velot mien Jesaz nich.

³Ekj wia een wieekj lieeja Sän bie mienem Voda, un de eensja dän miene Mutta om sikj haud.

⁴Hee lieed mie un säd to mie: Behool miene Wieed en dien Hoat; hool miene Jebooten, dan woascht du läwen.

⁵Nemm Weisheit aun, saumel Vestentnis, un vejat dee nich; hool die aun daut, waut ekj die jesajcht hab.

⁶Velot dee nich, un dee woat die bewoaren; sie dee goot, un dee woat äwa die woaken.

⁷Weisheit es äwa aules; see dee to kjrieen; bruck aules waut du hast om Vestentnis to kjrieen.

⁸Jeff dee grooten Wieet, dan woat see doano seenen, daut Menschen die en Ieren hoolen; see woat die ieren wan du ar aun dien Hoat drekjst.

⁹See woat die eenen Jnodenkraunz opp däm Kopp lajen, un woat die met eene prachtvolle Kroon zieren.

¹⁰Horch, mien Kjint, un nemm aun waut ekj jesajcht hab, dan woascht du väl Joaren läwen.

¹¹Ekj wies die dän Wajch wua du Weisheit finjst; ekj hab die dän rechtjen Stich jeleit.

¹²Wan du jeist, woascht du die nich vestaupen, un wan du ranst, woascht du nich faulen.

¹³Hool die aun waut du jeliet hast, un lot de Weisheit nich loos. Hool dee, daut es dien Läwen.

¹⁴Go nich opp de gottloose äaren Stich, doo nich soo aus de schlajchte doonen.

¹⁵Lot dee toch un go nich dän Wajch, hool die doavon wajch un go wieda.

¹⁶De schlajchte schlopen nich ea see beeset jedonen haben, un see kjennen nich schlopen, wan see nich wäm kjennen tofaul brinjen.

¹⁷See näaren sikj met de gottloose äa Broot, un drinkjen de Vebräakja äaren Wien.

¹⁸Oba de jerajchte äa Wajch es soo aus de Sonnen Oppgank, dee doa emma dacha woat bat daut aum hechsten es.

¹⁹Oba de gottloose äa Wajch es soo aus de diestre Nacht. Dee weeten nich äwa waut see faulen.

²⁰Mien Sän, acht doaropp waut ekj saj, un hool dien Ua han wan ekj räd.

²¹Vejat niemols waut ekj jesajcht hab; hool dee Wieed deep em Hoat,

²²wiels dee sent Läwen fa dee, dee dee finjen, un sent jesunt fa äaren gaunzen Kjarpa.

²³Moak secha daut du em Hoat weis best, daut es wuaderch dien Läwen kjemt.

²⁴See doano daut du kjeenem met diene Räd veleitst, un daut du met vekjieede Vetal nuscht to doonen hast.

²⁵Lot diene Uagen jlikj ver sikj kjikjen; lot diene Uagen sikj aun daut hoolen waut jlikj un rajcht es.

²⁶Paus opp wua du jeist, dan woascht du en aul diene Wäaj secha gonen.

²⁷Go nich rajchtsch uk nich linkjsch vom rajchten Wajch rauf; bliew von aulet beese wajch.