Read Plautdietsch (Low German) – De Bibel Spricha 7 Bible Online

Spricha 7 - Plautdietsch (Low German) – De Bibel bible

Spricha 7

¹Mien Kjint, vejat nich waut ekj säd, un vejat niemols waut ekj säd du doonen sust.

²Doo waut ekj die jesajcht hab, dan woascht du läwen. Bewoa miene Lia soo aus dän Kjikja em Uag.

³Binj die dee aum Finja un hool dee em Hoat, aus wan dee doljeschräwen sent.

⁴Saj to de Weisheit: Du best miene Sesta, un nan de Kluakheit: dien notstet Frintschoft,

⁵daut dee die von de framde Fru wajchhelt, von de onmoralische un glautmulje.

⁶Ekj wia emol en mien Hus un kjikjt toom Fensta rut.

⁷Ekj kjikjt no de onbedochte junge Mana un sach mank dee eenen dee sien Vestaunt nich brukt.

⁸Hee jinkj velenjd de Gaus, dicht bie dee Akj wua eene jewesse Fru wond, un jinkj no äa Hus opptoo,

⁹jäajen Owent em Tweediesta aus daut diesta wort.

¹⁰Dan kjeem de Fru rut am to bejäajnen. See wia aunjetrocken aus eene Hua un haud äaren Plon reed.

¹¹(See es lud un haslich, äare Feet bliewen niemols tus.

¹²Nu es see opp de Gaus, nu opp däm Saumelplauz. See steit opp aule Akjen opp de Lua.)

¹³See kjrieech am to hoolen un kust am, un säd gaunz driest to am:

¹⁴“Ekj hab vondoag Dankopfa fa mie jebrocht un hab mien Vespräakjen ver Gott jehoolen.

¹⁵Doawäajen kjeem ekj rut die to trafen; ekj socht no die un hab die jefungen.

¹⁶Ekj hab mien Bad met eene bunte Lienzeich Spreed von Ägipten bedakjt.

¹⁷Ekj hab mien Bad met scheenrikjende Mirren un Kerneel Eelj besprezt.

¹⁸Komm, well wie ons de nachtäwa goot sennen; well wie ons daut scheengonen loten.

¹⁹Mien Maun es nich tus; dee es opp eene lange Reis jefoaren.

²⁰Hee neem siene Jelttausch voll Jelt met, un woat nich ea aus toom Volmon no Hus komen.”

²¹Soo veleid see am met scheene Wieed un jewonn am met äa glautmuljet Schmeichlen.

²²Met eemol jinkj hee ar hinjaraun, soo aus een Oss nom Schlachta, soo aus een Ree en de Schlenj nenn staupt,

²³bat am een Feil derch de Läwa stuak. Soo aus een Voagel em Nat nenn flicht, un nich weet daut am daut sien Läwen kost.

²⁴Nu, miene Säns, horcht no mie; nämt junt daut aun waut ekj saj.

²⁵Lot soone Fru nich jun Hoat jewennen, un ert nich opp äare Wäaj nopp.

²⁶See haft väl Mana en de Grunt jebrocht, un es mea toom Doot jewast aus eena talen kaun.

²⁷Äa Hus es een Huachwajch nom Grauf, wua eena rauf en daut Doodenrikj nenn foat.