Read Plautdietsch (Low German) – De Bibel Spricha 9 Bible Online

Spricha 9 - Plautdietsch (Low German) – De Bibel bible

Spricha 9

¹Weisheit haft äa Hus jebut. See haft daut opp säwen utjehakte Feilen jebut.

²See haft äa Fleesch jereet un äaren Wien toopjerieet, un haft uk äaren Desch oppjesat.

³See haft uk äare Kjäakjsches rutjeschekjt, daut see von de hechste Städen en de Staut roopen:

⁴“Lot aule onvestendje hia nenn komen!” Un to de onbedochte sajcht see:

⁵“Ät mien Äten un drinkjt dän Wien dän ekj toopjerieet hab.

⁶Komt von june onvestendje Wäaj, dan woa jie läwen; waundelt en vestendje Wäaj.”

⁷Wäa eenen Spetta trajchthalpt, recht sikj Beleidjunk aun. Wan du eenen gottloosen vemonst, woat dee die Schoden aundoonen.

⁸Vemon nich eenen Spetta; dee woat die veachten. Vemon eenen weisen Maun, dee woat die goot sennen.

⁹Belia eenen Weisen, un dee woat noch weisa woaren; belia eenen jerajchten Maun, un dee woat weisa woaren.

¹⁰De Weisheit fangt aun wan eena däm HARN fercht; dän Heiljen kjanen lieren, brinjt Vestentnis.

¹¹Derch mie woaren diene Doag väl sennen, un die woaren Joaren toom Läwen biejetalt woaren.

¹²Wan du weis best, woat diene Weisheit die beloonen, oba wan du een Spetta best, woascht du selfst doarunja lieden.

¹³Daut jeft een duseljet ludet Frumensch, dee äaren Vestaunt nich brukt un kjeene Schomp haft.

¹⁴See sett opp eenen Stool bie de Däa von äa Hus, opp däm hechsten Plauz en de Staut.

¹⁵See schricht dee aun dee doa vebie gonen, un opp däm rajchten Wajch gonen:

¹⁶“Lot aule ojjelieede hia nenn komen.” To dee, dee daut aun Vestentnis fält sajcht see:

¹⁷“Jestolnet Wota es seet, un Broot em Jeheemen jejäten schmakjt scheen.”

¹⁸Oba see weeten nich daut de Doodje doa sent, daut äare Jast deep em Grauf ligjen.