Read Plautdietsch (Low German) – De Bibel Liera 11 Bible Online

Liera 11 - Plautdietsch (Low German) – De Bibel bible

Liera 11

¹Lot dien Broot oppem Wota foaren, dan woascht du daut met de Tiet finjen.

²Jeff een Poat no säwen ooda acht; du weetst nich, waut von Trubbel oppe Ieed komen woat.

³Wan de Wolkjen voll sent, dan räajent daut oppem Launt. Auf nom Nuaden ooda Sieden, wua een Boom hanfelt, doa blift dee ligjen.

⁴Wäa too sea nom Wada oppaust, woat nich toom seien komen; un wäa bloos no de Wolkjen kjikjt, woat nich siene Arnt nenbrinjen.

⁵Soo aus eena nich weet, waut de Wint doonen woat, ooda woo sikj daut met daut niee Läwen em Muttalief romnemt, soo vesteit eena nich Gott siene Wäaj, ooda aules, waut hee deit.

⁶Fang zemorjes aun to seien, un hia nich opp ea daut Owent es; du weetst nich, waut to waut goodet kjemt, auf dit ooda daut, ooda beides.

⁷Wan daut dach woat, läft eena opp, eena freit sikj to dän Sonnenschien.

⁸Wan een Mensch väl Joaren läft, sull hee sikj to dee aula freien; oba hee mott daut em Denkj hoolen, daut de diestra Dach lank es; waut noch aules kjemt, kjenn wie nich vestonen.

⁹Mensch, frei die to diene Jugentjoaren, lot die dee von Hoaten scheen gonen; besee die daut Läwen un denkj doa goot äwa no, woonen Wajch du gonen west; un denkj emma doaraun: Doano aus du läfst, woat Gott die em Jerecht behaundlen.

¹⁰Lot die nich dän Moot vedoawen, un schoon dienen Kjarpa von Schoden; wiels en de Jugentjoaren, de Tiet wan wie naunwaussen, sent doa väle Sachen, dee wie nich vestonen.