Read Plautdietsch (Low German) – De Bibel Liera 12 Bible Online

Liera 12 - Plautdietsch (Low German) – De Bibel bible

Liera 12

¹Hool em Denkj, wäa die jemoakt haft, uk wan du junk best, ea de schwoare Tiet kjemt, de Joaren wan du meest, daut jeit nich mea scheen.

²Dan vedunkelt eenem de Sonn, un daut Licht von de Mon un Stierns vegonen, un de Wolkjen komen nom Räajen wada.

³Dan kjemt de Tiet, wua de Wajchta fa eenem Hus flautren, un de stoakje sikj bekjen, un dee waut molen too weinich woaren un opphieren, un daut fa dee diesta woat, dee derch de Fenstren kjikjen.

⁴Dan gonen de Däaren aun de Gaus too, un daut Jeruzh von de Mäl woat leis, eena steit met de Väajel toop opp, un aul de scheene Leeda vegonen.

⁵Eena fercht sikj fa huaget, un haft angst fa daut waut oppem Wajch passieet; de Maundelboom blieecht, un de Graushoppa schlapt sikj delenjd; de Janka es nich mea doa, wiels de Mensch doahan jeit, wua hee opp emma bliewen mott; un de Lied oppe Gaus truaren.

⁶Dan ritt de selwana Strank auf, un de goldne Komm brakjt twei; de Ama bie de Kjwal veschleit, un daut Raut brakjt twei un felt em Borm.

⁷Dan jeit de Stoff trigj no de Ieed, von wua dee uk jekomen es, un de Jeist jeit trigj no Gott, dee dän jejäft haft.

⁸Daut es nich to bejriepen, sajcht de Liera, bloos nich to bejriepen. Daut es aulatoop nich to vestonen.

⁹De Liera wia een weisa Maun, un lieed de Menschen emma mea vestonen. Hee haft väle Spricha aufjeschazt un derchjedocht, un trajchtjestalt fa daut Volkj.

¹⁰De Liera vesocht daut fein to sajen, un waut hee schreef, daut wia soo aus daut es.

¹¹Waut de Weise sajen, es soo aus Stachels, un de Spricha sent soo aus enjeschloagne Näajel; eena, dee een Hoad es, haft ons dee jejäft.

¹²Mien Sän, doa sull noch waut jesajcht woaren aus Woarnunk: Wie woaren nienich foadich sennen met Bieekja moaken, un wäa väl lieren well, woat doaderch meed woaren.

¹³Well wie emol sajen, waut daut Wichtichste von aule Lieren es: Hab Ieaforcht fa Gott, un hool siene Jesazen; daut es aules waut von Menschen velangt es.

¹⁴Gott woat aule Sachen, aules waut uk vestoaken es, auf goodet ooda schlajchtet, rechten.