Read Plautdietsch (Low German) – De Bibel Liera 3 Bible Online

Liera 3 - Plautdietsch (Low German) – De Bibel bible

Liera 3

¹Aules haft siene Jeläajenheit; doa es eene Tiet fa jieda Sach oppe Ieed.

²Jebuaren woaren haft siene Tiet, stoawen haft siene Tiet, plaunten haft siene Tiet, utrieten haft siene Tiet.

³Doot schlonen haft siene Tiet, veheelen haft siene Tiet, dolrieten haft siene Tiet, oppbuen haft siene Tiet;

⁴hielen haft siene Tiet, lachen haft siene Tiet, truaren haft siene Tiet, daunzen haft siene Tiet.

⁵Steena schmieten haft siene Tiet, nich Steena schmieten haft siene Tiet, wäm goot drekjen haft siene Tiet, nich goot drekjen haft siene Tiet;

⁶finjen haft siene Tiet, velieren haft siene Tiet, biebehoolen haft siene Tiet, wajchschmieten haft siene Tiet.

⁷Tweirieten haft siene Tiet, toopneien haft siene Tiet, stell sennen haft siene Tiet, räden haft siene Tiet.

⁸Goot sennen haft siene Tiet, veläajen sennen haft siene Tiet, kjriejen haft siene Tiet, frädlich sennen haft siene Tiet.

⁹Waut nuzt däm Oabeida sien sträwen?

¹⁰Ekj hab nojeseenen wäajen de Oabeit, dee Gott de Menschen jejäft haft, daut see dee doonen.

¹¹Soo aus hee daut enjefieet haft, lat de Tiet sikj fa aules schekjen, un hee haft däm Mensch eene Oninj jejäft von Tieden, von dee wie nuscht weeten; wie woaren nienich aules waut Gott deit, vom Aunfank bat aum Enj, vestonen.

¹²Dan wort mie daut kloa, daut et nuscht bätret fa eenem jeft, aus daut eena sikj daut em Läwen scheen gonen lat un goot läft,

¹³daut meent daut eena at un drinkjt, un en aul sien bemieejen, sikj daut scheen gonen lat. Daut kjemt aula von Gott.

¹⁴Un mie wort daut kloa, daut aules, waut Gott deit, opp emma blift; un doa es uk nuscht, waut doa bietosaten jeit, ooda waut eena doavon wajchnämen kaun. Gott haft aules soo enjefieet, daut wie Ieaforcht fa am haben.

¹⁵Daut waut passieet, es aul jewast; un daut waut noch sennen woat, es uk aul jewast. Gott sitt emma wada, waut fa ons aul vebie es.

¹⁶Un ekj sach uk, daut doa opp dise Ieed, wua nom rajcht jeseenen sull, soogoa doa jinkj daut orrajcht, un wua eena jleewd, daut see wudden jerajcht sennen, soogoa doa jinkj daut gottloos too.

¹⁷Dan docht ekj bie mie, Gott woat de jerajchte un de ojjerajchte ver Jerecht brinjen; doa woat eene Tiet sennen fa jieda Dinkj, waut oppe Ieed passieet.

¹⁸Un ekj docht uk bie mie, daut Gott prooft de Menschen auf, daut see enseenen, daut see selfst soo aus Vee sent.

¹⁹Daut jeit met de Menschen soo aus met daut Vee: dee motten beid stoawen. Dee haben beid dän läwendjen Odem, un en däm Senn, sent dee äwareen. Daut es bloos nich to bejriepen.

²⁰Aules haft daut selwje Enj. Aules es von Ieed jekomen, un aules woat wada to Ieed.

²¹Kjeena weet auf de läwendja Odem vom Mensch enne Hecht jeit, un dee vom Vee rauf, enne Ieed nenn jeit.

²²Un soo wort mie daut kloa, daut doa nuscht bätret fa däm Mensch es, aus daut hee sikj lat siene Oabeit scheengonen; daut es waut hee doafäa kjricht. Ooda es doa wäa, dee am wiesen kaun, waut nohäa kjemt?