Read Plautdietsch (Low German) – De Bibel Daut Leet 4 Bible Online

Daut Leet 4 - Plautdietsch (Low German) – De Bibel bible

Daut Leet 4

¹Hee Oba die lat et soo schmock; miene scheenste, die lat et soo schmock. Diene Uagen von hinja dien Schleia sent saunft aus ne Duw. Soo aus Kosen von Gilead streemen, soo henjen de Hoa von dien Kopp.

²Diene Tänen, dee stonen aus Schop, dee nom schäaren un wauschen oppkomen; jieda eene haft twee bie sikj stonen, un kjeene fält daut noch aun dee.

³Diene Leppen sent kloa roode Eesen, dien Mul lat mie bloos sea schmock. Un de Baken sent Baken von Apel, dee hinja dien Schleia väa schienen.

⁴Dien Hauls es soo steil aus de Schutz Torm, dee David met glautet Steen bud; un de Haulskjäden blenkjren runt om aus de Schilten von 1.000 Soldoten.

⁵De Brost es een Poakje Gazellen, dee leicht mank de Lelje oppstonen.

⁶Ekj go schwind no de Boaj von de Mirren un Weiruak, ea de Morjen aunkjemt un de Schauten veschwinjt.

⁷Oba die lat et soo schmock, miene scheenste, die lat et soo schmock, Du, mien Schauz, du best aulawäajen schmock, ekj finj bloos kjeen Fäla aun die.

⁸Komm emol met mie, miene Brut; ut däm Libanon, komm. Moak die frie von däm Boajch Amana, un von Senir un Hermon, wua Leiws un Leoparden rejieren. Komm met, du mien Schauz.

⁹Du hast mie mien Hoat gaunz benomen, met een Blekj met de Uagen, mien Schauz; met een Baunt von de Kralen aum Hauls, hast mien Hoat, miene Brut un mien Schauz.

¹⁰Daut jeit mie soo scheen, wan du mie soo goot best, miene Brut un mien Schauz, daut es scheena aus Wien en mien Mul; dien Parfum es de scheensta waut daut jeft.

¹¹Mien Schauz, diene Leppen sent seet, du hast Honnich un Malkj unjare Tung, un dien Kjleet rikjt soo scheen aus de Libanon.

¹²Miene Brut un mien Schauz es een Goaden veschloten; see es ne Kjwal aufjejrenst, un een Borm gaunz bedakjt.

¹³Jo, du best mie een Paradies Goaden, met scheenste Granat Apelbeem, un met Henna un Narden Eeljbeem,

¹⁴uk met Safran un Kalmus, Kerneel un uk Weiruak un Mirren un Alo, von jieda Sort scheenste Jewerz.

¹⁵Du best eene Kjwal en däm Goaden, een Borm, dee doa väl Wota jeft, daut et rant von de Libanon Boaj. See

¹⁶Lot däm Nuadwint nu komen, mucht de Siedwint doch weien, daut Jeroch von mien Goaden metnämen. Lot mien Schauz en sien Goaden nenn komen, un äten de Frucht, waut dee jeft.