Read Plautdietsch (Low German) – De Bibel Jesaja 1 Bible Online

Jesaja 1 - Plautdietsch (Low German) – De Bibel bible

Jesaja 1

¹Hia es waut de HAR däm Profeet Jesaja, Amoz sien Sän, kloa muak äwa daut Launt Juda un de Staut Jerusalem. Dit wort aula en de Tiet aus en Juda de Kjennichs Usija, Jotam, Ahas un Hiskia eena nom aundren rejieeden.

²Horcht emol, jie Himmel, un du, Ieed, paus opp waut ekj saj: Ekj, de HAR, hab waut to junt to sajen. Ekj hab waut Kjinja jehaut, un hab dee groot jekjräajen, un nu haben dee sikj jäajen mie jestalt.

³Een Oss weet, daut hee no sien Wieet horchen well, un een Äsel kjemt emma nom Wieet siene Kjrebb, oba Israel weet soont nich, un mien Volkj lieet soont nich.

⁴Woo woat daut met een Volkj gonen, waut sikj vesindicht haft, un waut sikj groote Schult oppjelot haft? De Menschen doonen nich waut rajcht es, un dee waut naun waussen, vegonen sikj schlemm. See hoolen sikj nich aum HARN, un veachten däm, dee en Israel heilich es, un sent von am aufjefollen.

⁵Hab jie noch nich jenuach Strof jekjräajen, daut jie noch eegol jäajenaun sent? Jie sent je aul gaunz Wund jeschloagen, un haben meist nich Moot toom wieda gonen.

⁶Von unjare Feet bat bowen oppem Kopp, es nuscht waut gaunz jesunt es. Aule Schlemsen un Schwäaren kjietren; kjeent es enjeschmäat, ooda utjedrekjt un vebungen.

⁷Jun Launt es vewoaloost, un de Städa vebrent; jie motten daut aunseenen woo framde june Arnt vebrinjen; un Utlenda daut Launt vedoawen.

⁸Bloos daut scheene Zion es jebläwen, aus eene Bood em Wiengoaden; soo aus een Huskje oppem Gurkjenflekj, un aus eene Staut dee vom Fient besat es.

⁹Wan de HAR, dee aules rejieet, ons nich een Äwabliefsel von Menschen jeloten haud, wia ons daut soo aus Sodom, un aus Gomorra jegonen.

¹⁰Horcht waut de HAR to sajen haft, dee jie soo aus de Leida von Sodom läwen. Paust opp no waut Gott junt jelieet haft, dee jie aus de Menschen en Gomorra sent.

¹¹Waut sellen mie aul june Opfa bedieden? frajcht de HAR. Mie es daut aul gaunz jenuach met june Brauntopfa von Bakj, un von daut Fat von Mastvee. Aul daut Bloot von Bolles un Lama un Kosen jefelt mie nuscht.

¹²Wan jie ver mie komen, wäa velangt daut von junt, daut jie mien Bennahoff vetraumplen?

¹³Hieet opp met june Speisopfa, waut nuscht bedieden; jun Weiruak es mie jäajenaun. Ekj kaun daut nich vedroagen, wan jie biem Sabat hoolen, Niemon fieren un aun de Heljedoag, junt uk noch vesindjen.

¹⁴June Fast toom Niemon un dee aundre Heljedoag, äakjlen mie. Mie es daut schwoa dee auntoseenen; ekj kaun dee meist nich uthoolen.

¹⁵Wan jie june Henj no mie utstrakjen, woa ekj sest wua hankjikjen; uk wan jie väl bäden, woa ekj nich horchen, wäajen de Schult, waut jie oppe Henj haben.

¹⁶Wauscht junt emol rein. Hieet opp met de beese Sachen, dee ekj mank junt see; hieet opp met june Sinden.

¹⁷Eeft junt en goodet doonen; seet daut jie rajcht haundlen; moakt een Enj met Menschen utnutzen; halpt de Weisen un rät fa de Wätfrues.

¹⁸Komt emol toop, sajcht de HAR, un well wie daut derch räden. Uk wan june Sinden dunkelroot sent, kjennen dee Schnee witt woaren; un wan see aus dunkelroodet Zeich sent, kjennen dee witt aus Woll woaren.

¹⁹Wan jie enweljen un jehorchen woaren, dan woa jie goot vom Launt kjrieen;

²⁰oba wan jie woaren jäajenaun sennen, woat daut Schwieet junt ombrinjen, daut es waut de HAR selfst sajcht.

²¹Woo es de Staut, opp dee wie ons veleeten, soo ontru jeworden? Doa wua emma nom rajcht jeseenen wort, dee waut bekaunt wia, daut see ierlich wia, doa es nu beeset un Mort.

²²Daut es aus wan jun Selwa beschloagen es, un aus wan jun Wien met Wota jedempelt es.

²³Diene Leidasch sent Schuften, un hoolen sikj met dee waut stälen; dee loten sikj wellich bekjeepen, un sent hinjaraun no een Jeschenkj. See halpen de Weisen nich to äa rajcht, un stonen nich en fa de Wätfrues.

²⁴Oba nu sajcht de Aulmajchtja, de HAR, dee aules rejieet, dee waut en Israel de stoakja es: Jo, jo, ekj woa äwa dee, dee jäajen mie sent, mienen Oaja uteewen, un woa mie rajchen aun dee, waut mie fientlich sent.

²⁵Ekj woa miene Macht jäajen junt brinjen; ekj woa daut waut beschloagen es derch daut Fia schekjen, un wajchnämen waut junt orrein moakt.

²⁶Ekj woa june Rechta wada enfieren, soo aus daut emol wia; un junt Leidasch jäwen aus aum Aunfank. Dan woascht du bekaunt sennen, aus de Staut dee ierlich haundelt un opp woone eena een vetruen haft.

²⁷Derch rajcht doonen woat Zion bestonen bliewen, un dee waut omkjieren, derch jerajcht sennen.

²⁸Dee, dee jäajenaun sent, woaren toop met de Sinda enne Grunt jebrocht; un dee waut sikj vom HARN wajchdreien, woaren omkomen.

²⁹Dan woa jie junt met dän Jettadeenst schämen, dee junt no de groote Beem lokt; un jie woaren gaunz root woaren wäajen de Goades dee jie junt dan wälden.

³⁰Dan woa jie aus een vedrieejda Ieekjenboom stonen, un aus een Goaden dee nich Wota kjricht.

³¹Dee waut stoakj wia woat aus Struck sennen, un siene Oabeit aus eene Funk vom Fiastrikja; un dee woaren aulatoop vebrennen, un kjeena woat daut Fia utmoaken.