Read Plautdietsch (Low German) – De Bibel Jesaja 11 Bible Online

Jesaja 11 - Plautdietsch (Low German) – De Bibel bible

Jesaja 11

¹Soo aus een Aust ut een Stobben rutwaust, woat eena von David siene Nokomen oppkomen; von dee Wartel woat waut komen waut doa woat Frucht droagen.

²Opp däm woat däm HARN sien Jeist komen, een Jeist met Weisheit un Vestentnis, een Jeist met Rot un Krauft, een Jeist dee däm HARN kjant un am ieet;

³däm HARN ieren woat am eene Freid sennen. Hee woat nich bloos doano rechten aus waut hee sitt ooda hieet,

⁴hee woat de oame met een jerajchtet Jerecht rechten un de stelle woat hee daut äaje jäwen. Waut hee to sajen haft, woat de Ieed strofen, beese Menschen woaren hanjerecht woaren wan hee met daut Mul pusten woat.

⁵Hee woat daut rajchte doonen un opp sien Stekj bliewen, soo aus de HAR daut haben well.

⁶De Wilw un de Lama woaren frädlich toop läwen, de Leopard woat mank de Kosen ligjen, un een kjliena Jung woat Kjalwa un junge Leiws un Mastvee aules toop en eene Häad joagen.

⁷De Koo un de Boa woaren toop grosen, un äare junge woaren toop ligjen; de Leiw woat Stroo fräten aus de Oss.

⁸Daut Bäbe woat dicht bie daut Schlangenloch spälen, un daut nieschieeje Kjint woat siene Haunt doa nenn stäakjen.

⁹Doa woat kjeen Schoden ooda vedoawen opp mien gaunzen heiljen Boajch sennen; un soo aus Wota daut gaunze Mäa bedakjt, soo woat en daut gaunze Launt Vestentnis fa däm HARN sennen.

¹⁰Wan dee Tiet kjemt, woat de Aust dee von Isai woss, daut Tieekjen fa de Velkja sennen. De Lenda woaren dan no dän nieen Leida froagen un doa, wua hee rejieet, woat daut groosoatich sennen.

¹¹Un wan dee Tiet doa es, woat de HAR toom tweeden mol siene Haunt opphäwen, un hee woat dee, dee von sien Volkj en Assierien, Ägipten, Patros, Kusch, Elam, Schinar, Hamat, un de Lenda aum Mäa, äwajebläwen sent, trigjbrinjen.

¹²De HAR woat sien Tieekjen jäwen fa aule Velkja, un woat aul dee, waut von Israel wajchjefieet wieren, un dee waut von Juda vestreit wieren, von aulawäajen oppe Ieed toopbrinjen.

¹³Efraim siene Aufgonst woat veschwinjen, un Juda woat nich mea fientlich sennen. Efraim woat Juda nich mea aufjenstich sennen, un Juda woat Efraim nich mea aus een Fient talen.

¹⁴See woaren toop nom Wasten han, de Filista aunjriepen, un toop de Velkja nom Oosten han bestälen. See woaren äare Macht wiesen äwa Edom un Moab, un de Amonita woaren an unjadon sennen.

¹⁵De HAR woat de Bucht von daut ägiptische Mäa utdrieejen, un woat en siene Macht eenen stoakjen Wint äwa dän Eufrat Riefa blosen, daut dee en säwen nate Riefasch vedeelt, soo daut doa aulawäajen tofoot derchtogonen jeit.

¹⁶Doa woat een feina Wajch von Assur no Israel sennen fa dee waut von sien Volkj äwajebläwen sent, krakjt soo aus daut emol wia aus de Israeliten ut Ägipten rutkjeemen.