Read Plautdietsch (Low German) – De Bibel Jesaja 13 Bible Online

Jesaja 13 - Plautdietsch (Low German) – De Bibel bible

Jesaja 13

¹Dit es waut Jesaja, Amoz sien Sän, groot wort äwa Babel:

²Opp eenen kolen Boajch stalt eene Flag opp, roopt lud un wenjt met de Haunt, daut see derch de Leidasch äare Puaten gonen.

³Ekj hab dee, dee ekj mie jeheilicht hab un waut sikj to miene Majestät freien, oppjeroopt, daut see mienen Oaja utfieren.

⁴Horcht no daut lude omhäagonen oppe Boaj, aus wan doa sea väl Menschen sent. Horcht no daut Jelud von väle Lenda, von väle Velkja dee doa toopjekomen sent. De HAR, dee aules rejieet, moakt een Häa reed fa dän Kaumf.

⁵Dee komen von wiet häa, wieda aus wie vestonen, un de HAR es met an un brukt an en sienen Oaja, de Ieed to venichten.

⁶Hielt un schriet! wiels däm HARN sien Dach es dicht bie; dee kjemt met een grootet vedoawen vom däm dee aule Macht haft.

⁷Dan woaren eenem jiedren siene Henj schlaup sennen, un jiedrem woat sien Moot veschorren;

⁸dee woaren sikj fa Angst nich Rot weeten, dee woaren aungonen un benomen sennen, dee woaren sikj kjremmen aus eene Fru en äare Weedoag. See gloaren sikj met fiaroode Jesechta aun un weeten sikj nich Rot.

⁹Däm HARN sien Dach kjemt grausom, en sienen Oaja un siene Wutt; un de Ieed woat venicht woaren, un de Sinda woaren utjerot woaren.

¹⁰De Orion un de aundre Stierns woaren nich mea schienen; de Sonn woat biem oppgonen kjeen Licht jäwen; un de Mon woat nich mea schienen.

¹¹Ekj woa de Welt bestrofen, fa aul daut, waut dee veschulcht haft, un de gottloose fa äare Sinden. Ekj woa een Enj moaken von dee, dee driest un huachnäsich Jewault eewen.

¹²Von Menschen woat daut weinja jäwen aus Golt, weinja Mana aus Golt von Ofir.

¹³Aun dän Dach wan ekj mienen Oaja looslot, woa ekj, de HAR, dee aules rejieet, dän Himmel aum zetren brinjen, un de Ieed vom Fundament schedren en miene Wutt.

¹⁴Soo aus een Ree oppe Jacht ooda Schop onen een Hoad woaren aule äa ieejnet Volkj sieekjen un no äa ieejnet Launt flichten.

¹⁵Wan noch wäa jefungen woat, dän woaren see stäakjen, un wäa jejräpen woat, woat met daut Schwieet omjebrocht.

¹⁶See woaren daut seenen, daut äare kjliene Kjinja dootjeschloagen woaren, daut äare Hiesa bestolen woaren, un daut met äare Frues Schaund jedräwen woat.

¹⁷Ekj woa de Meeda jäajen an opphetzen, dee nich hinjaraun no Selwa sent, un om Golt nuscht romjäwen.

¹⁸Dee woaren de junge Mana met däm Boagen scheeten, un hoatnakich met Bäbes vehaundlen un kjeen Metlieden fa Kjinja haben.

¹⁹Babel es de schmokste Staut mank de Velkja, un met dee meenen de Chaldäa sikj väl, oba Gott woat dee venichten, soo aus hee Sodom un Gomorra deed,

²⁰daut enne komende Tieden doa nienich wada wäa wonen ooda bliewen woat, un kjeene Araba äare Zelten doa oppstalen, ooda Hoads äare Schop doa grosen loten.

²¹Doa woaren bloos wille Tieren sikj Tus moaken, un waut von de Jebieda äwablift woat voll Ulen sennen; de Straussen woaren doa läwen, un wille Kosen woaren doa sprinjen.

²²Wille Hunj woaren en de Paulausten julen, un Kajotes en de Hiesa, wua see lostich wieren. Dee Tiet woat boolt hia sennen, daut woat aul nich lang dieren.