Read Plautdietsch (Low German) – De Bibel Jesaja 16 Bible Online

Jesaja 16 - Plautdietsch (Low German) – De Bibel bible

Jesaja 16

¹Schekjt Lama von Sela derch de Wiltnis, no däm Leida em Launt opp daut scheene Zion.

²De Frues von Moab haben sikj biem Arnon Riefa vesaumelt, soo aus Väajel dee vom Nast veschechat sent.

³(Dee waut von Moab jeschekjt wort, sajcht:) “Jäft ons Rot. Doot waut rajcht es. Moakt jun Schauten opp Meddach soo dunkel aus de Nacht; vestäakjt dee, dee jeflicht sent, un jäft dee nich rut nom Fient.

⁴Lot de vejoagde von Moab bie junt wonen; jäft an Schutz von däm dee an ombrinjen well.” Dee waut ons daut schwoa moakt, woat noch opphieren; dee waut ons aules vedoaft, woat een Enj haben; un dee waut ons kjwält, woat utem Launt motten.

⁵Dan woat een Leida oppjestalt woaren, dee jenstich un leeftolich es; eena von David siene Nokomen woat truhoatich rejieren. Hee woat doano seenen daut rajcht jerecht woat, un waut eena vedeent haft, nich vetrakjen loten.

⁶(De Lied en Juda sajen:) Wie haben jehieet, woo väl Moab von sikj denkjt, woo grootsch see sikj denkjen, woo stolt un mootwellich dee sent, oba daut es sea windich jerät.

⁷Lot de Moabita äwa dit truaren; see woaren noch aula jaumalich hielen. See woaren hielen un sea truarich sennen wiels de Rasienen Kuaken von Kir Heres utbliewen.

⁸De Stapen rom Heschbon sent venicht, un de Wiengoades bie Sibma sent vedorwen. De Leidasch von de Lenda haben de scheene Ranken dol jetraumpelt waut ieescht bat Jaser rieekjten un sikj bat enne Wiltnis vespreeden; de Auflaja rieekjten bat aun daut Mäa.

⁹Nu hiel ekj krakjt soo aus de Lied en Jaser, äwa de Wiengoades en Sibma; mie ranen de Tronen fa Heschbon un Elale. En de Städ von de Schnieda äa jlekjeljet schrieen, wia doa bie de Arnt daut schrieen von Soldoten.

¹⁰Doa freit sikj kjeena to de Arnt. Doa sinjt un schricht kjeena en de Wiengoades, un kjeena prast Wiendruwen ut, ooda tieet sikj äwa de goode Frucht.

¹¹Mien Hoat kloacht aus eene Hoap fa Moab, un miene Seel ritt fa Kir Heres.

¹²Wan de Moabita sikj uk meed moaken met no de huage Opfastäden gonen un en äa Heilichtum aunbäden, woat daut aula nuscht halpen.

¹³Dit es waut de HAR don emol äwa Moab säd.

¹⁴Oba nu sajcht de HAR: En dree Joa, du kaust die daut krakjt auftalen, woat aul daut scheene en Moab veacht woaren un von aul dee väle Menschen weinich äwabliewen. Daut woat nich väl meenen met an.