Read Plautdietsch (Low German) – De Bibel Jesaja 18 Bible Online

Jesaja 18 - Plautdietsch (Low German) – De Bibel bible

Jesaja 18

¹Woo woat daut doch met daut Launt Kusch gonen, wua de bosje Boots oppe Riefasch surren.

²Dee schekjen Norecht delenjd däm Niel Riefa en Boots dee von Schelp jemoakt sent. Schekjt dee Boots nu trigj no daut Launt, daut soo väl Riefasch haft, un een Volkj haft daut groot jewossen es un glaute Hut haft, daut wiet un breet jefercht woat, wiels see soo stoakj un jewaultmässich omhäagonen;

³Lot aule Menschen oppe Ieed, un dee, dee jie oppe Welt wonen, häahorchen. Wan de Flag oppem Boajch woat oppjehowen woaren, dan kjikjt; un wan de Trompeet blost, dan horcht.

⁴Dit es waut de HAR to mie sajcht: Ekj woa von opp miene Städ kjikjen, soo eendrajchtich aus de Hett von de Sonn opp Meddach, un soo jeduldich aus de Deiw, wan jie arnten.

⁵Ver de Arnt, wan daut Blieechsel oba aul vedrieecht es, ea de Wiendruwen gaunz riep sent, woaren de Scheeren de Ranken aufschnieden, un de Stam aufjehakt un toop jeschmäten woaren.

⁶Un dee woaren bliewen aus Fooda fa de Hofkjes von enne Boaj, un de wille Tieren oppem Launt. Un de Väajel woaren doa em Somma fräten, un em Winta veschiedne Tieren von oppem Launt.

⁷Un wan dee Tiet kjemt, woat daut grootjewosne Volkj met de glaute Hut, waut dolla to ferchten es aus sest wäa, wiels see soo stoakj un jewaultmässich sent, von en äa Launt, daut soo väl Riefasch haft, no däm Zions Boajch Gowen brinjen fa däm HARN, dee aules rejieet.