Read Plautdietsch (Low German) – De Bibel Jesaja 19 Bible Online

Jesaja 19 - Plautdietsch (Low German) – De Bibel bible

Jesaja 19

¹De Norecht äwa Ägipten es dise: Kjikjt emol. De HAR kjemt no Ägipten, hee kjemt bosich opp eene Wolkj. De Jetta en Ägipten woaren ver am zetren, un de Lied woaren aulen Moot velieren.

²Ekj woa de Ägipta, eena jäajen dän aundren opphetzen, daut see eena jäajen dän aundren kjamfen; Nobasch woaren jäajen Nobasch kjamfen, Städa woaren jäajen aundre Städa, un een Poat vom Rikj jäajen daut aundre.

³De Ägipta woaren aulen Moot velieren un ekj woa äare Plons to nuscht moaken; see woaren dan de Jetta aunroopen un dee waut met Jeista un Vestorwne räden, no Rot froagen.

⁴Ekj woa de Ägipta en de Macht von eenen ruchloosen Leida jäwen; een sea strenja Kjennich woat äwa an rejieren, sajcht de Aulmajchtja, de HAR, dee aules rejieet.

⁵Daut Wota em Niel woat veschwinjen, un de Riefa woat vesajen un utdrieejen.

⁶De Kanols woaren stenkjrich woaren, un de Riefasch en Ägipten vesajen un utdrieejen, soo daut Schelp un Struck vefaulen woaren.

⁷Waut emma aum Riefa jreent, woat vedrieejen; de jeseide Flekja aum Niel woaren soo drieech sennen un met däm Wint wajchblosen, daut et nuscht mea met dee meent.

⁸De Feschalied woaren truarich sennen. Aul dee waut de Angel em Niel schmieten, woaren sikj bejaumren, un dee waut met daut Nat feschen, woaren bedrekjt sennen.

⁹Dee waut met Flaus oabeiden, woaren Schoden haben, beides dee waut kjamlen un dee waut wäwen.

¹⁰Daut woat schwoa sennen fa de Wäwa; un de Hauntoabeida woat sikj nich Rot weeten.

¹¹De Leidasch von Zoan sent schoslich, un däm Kjennich siene Rotjäwa jäwen daumeljen Rot. Woo kjennen dee noch sajen: “Ekj staum von de jewizte; ekj staum von dee waut ieescht emma Kjennichs wieren?”

¹²Wua sent dee von diene Mana, waut werkjlich weis sent, daut see die sajen kjennen, waut de HAR, dee aules rejieet, äwa Ägipten beschloten haft?

¹³De Leidasch en Zoan un Memfis sent schoslich un sent veleit worden; dee waut em Launt sullen veropp gonen, haben Ägipten veleit.

¹⁴De HAR haft an eene vewerde Jesennunk jejäft, un nu haben see Ägipten doaderch stolpren moakt, krakjt soo aus een bedrunkna en sien ieejnet Kotz.

¹⁵Kjeena woat waut to Staund brinjen en Ägipten, nich de Leidasch ooda dee waut hinjaraun gonen, nich de rikja ooda de jeweenelja.

¹⁶Wan dee Tiet kjemt, woaren de Menschen en Ägipten aula soo enjstlich sennen aus Frues. Dee woaren sikj sea vefieren wan de HAR, dee aules rejieet, met siene Macht äwa an kjemt.

¹⁷Dan woaren de Ägipta sikj fa daut Launt Juda enjsten, un jiedatsmol wan see denkjen aun daut waut de HAR, dee aules rejieet, äwa an beschloten haft, woaren see sikj veschrakjen.

¹⁸Wan dee Tiet kjemt, woaren en fiew Städa en Ägipten de selwje Sproak jerät woaren aus en Kanaan, un dee woaren sikj aun dän HARN, dee aules rejieet, hoolen. Eent von dee Städa woat Ir Heres, de Sonnen Staut, sennen.

¹⁹Wan dee Tiet kjemt, woat doa medden en Ägipten een Aultoa fa däm HARN stonen, un oppe Jrens woat een Steenmol fa däm HARN sennen.

²⁰Daut woaren Tieekjens un Zeijen sennen en Ägipten fa dän HARN, dee aules rejieet. Un wan de Lied doa woaren dän HARN aunbäden, wan see unjadrekjt woaren, dan woat hee wäm schekjen daut see jeholpen woaren un daut dee an raden woat.

²¹De HAR woat de Ägipta weeten loten wäa hee es, un de Ägipta woaren dan enseenen wäa hee es. Dee woaren am aunbäden, un Brauntopfa un Speisopfa fa am moaken. Dee woaren am äa Vespräakjen jäwen un daut utfieren.

²²De HAR woat de Ägipta bestrofen un dan wada opprechten. Dee woaren sikj no am kjieren, un hee woat no äare Jebäda horchen un an stoakj moaken.

²³Wan dee Tiet kjemt, woat doa een gooda Wajch sennen von Ägipten bat Assierien, soo daut de Assiera woaren no Ägipten un de Ägipta no Assierien gonen, un de Ägipta un Assiera woaren toop dän HARN aunbäden.

²⁴Wan dee Tiet kjemt, woat Israel de dredda sennen met Ägipten un Assierien, un een Säajen fa de gaunze Ieed sennen.

²⁵Un de HAR, dee aules rejieet, woat an säajnen un sajen: Ekj jäw die, Ägipten, mien Volkj, un die Assierien, dee ekj jemoakt hab, un die Israel, mien besondret Volkj, mienen Säajen.