Read Plautdietsch (Low German) – De Bibel Jesaja 2 Bible Online

Jesaja 2 - Plautdietsch (Low German) – De Bibel bible

Jesaja 2

¹Dit es waut Jesaja, Amoz sien Sän, kloa wort äwa Juda un Jerusalem, un to daut Volkj säd:

²Daut woat noch soo romkomen, daut däm HARN sien Boajch, wua däm HARN sien Tempel steit, woat jrata sennen aus aule aundre Boaj. Dee woat hecha aus de aundre Boaj sennen, un aule Velkja woaren doahan streemen.

³Väle Velkja woaren oppstonen un sajen: Komt, well wie opp däm HARN sien Boajch nopp gonen, no däm Tempel fa dän Gott dän Jakob deend; dee woat ons belieren, daut wie soo haundlen un soo läwen woaren, aus hee daut haben well. Daut Jesaz woat von Zion komen, un däm HARN sien Wuat von Jerusalem.

⁴Hee woat de Lenda rechten, un an wiesen waut rajcht es; dee woaren äare Schwieed to Pluachschoaren vekloppen, un äare Spiessen to Goaden Jereetschoft. Doa woat kjeen Launt jäajen daut aundre, siene Schwieed opphäwen; dee woaren nich mea toom Kjrich reedmoaken.

⁵Komt, Jakob siene Nokomen, well wie soo läwen aus de HAR ons daut wiest.

⁶Jie haben oppjehieet soo to läwen, aus jie aus Jakob siene Nokomen sullen; doa es väl Hakjsarie, soo aus em Oosten, un jie haben Woasaja, aus bie de Filista; jie jäwen junt väl auf met Lieren von aundre Lenda.

⁷Aulawäajen em Launt sitt eena Selwa un Golt, un de Schaza sent nich to talen; aulawäajen em Launt sitt eena Pieed, un äare Woages sent nich to talen.

⁸Aulawäajen em Launt sent Jetta; jie kjneeen junt ver daut waut jie selfst jemoakt haben, waut jie met june Henj jeformt haben.

⁹Un doawäajen woat de Mensch sikj deemootjen, un de Menschheit woat läach jebrocht woaren; mucht de HAR an daut nich vejäwen.

¹⁰Vekrupt junt enne Boaj, un vegroft junt enne Ieed, ut Angst fa däm HARN, dee soo groot un harlich es.

¹¹Wan de Dach kjemt, woaren aul dee sikj schämen, waut sikj waut besondret meenen; un de stolte woaren sikj kjneeen motten, un de HAR auleen woat Aunerkjanunk kjrieen.

¹²De HAR, dee aules rejieet, moakt sikj reed fa eenen Dach, wan hee aul dee waut grootsch un prauzich sent, un aul daut groosoatje woat rauf brinjen.

¹³De huage steile Zeeda opp Libanon un de Ieekjen en Baschan,

¹⁴aule huage Boaj un oppjebude Städen,

¹⁵aule huage Torms un Städa met Mieren,

¹⁶aule groote Schäp oppem Mäa, un uk aul de kjliene straume Lommen woaren läach jebrocht woaren.

¹⁷Daut grootsche mank de Menschen woat sikj vekjlandren, un de Stolt von Mana woat sikj deemootjen, un bloos de HAR, gaunz auleen, woat aun dän Dach aunerkjant woaren.

¹⁸Met de Jetta woat daut dan aula ut sennen.

¹⁹Un de Menschen woaren sikj enne Boaj vekrupen, wiels see sikj fa däm HARN enjsten. Wan de HAR oppsteit de Ieed en staunen to vesaten, woaren de Menschen sikj en Lajcha enne Ieed vestäakjen, wäajen hee soo groot un harlich es.

²⁰Wan dee Dach kjemt, woaren de Menschen äare selwane un goldne Jetta, dee see sikj jemoakt hauden toom aunbäden, no de Mies un Flautamies schmieten.

²¹Wan de HAR oppsteit de Ieed en staunen to vesaten, woaren de Menschen sikj en Spoolungen enne Boaj vestäakjen, un en Heelen mank de Steena vekrupen, wiels see sikj fa dän HARN enjsten, dee soo groot un harlich es.

²²Velot junt nich mea opp Menschen, dee voll Wint jeblost sent. Fa waut sullen dee aunjeseenen sennen?