Read Plautdietsch (Low German) – De Bibel Jesaja 20 Bible Online

Jesaja 20 - Plautdietsch (Low German) – De Bibel bible

Jesaja 20

¹Daut kjeem emol daut Sargon, de assierischa Kjennich, sienen Kjrichs Kommandaunt schekjt, daut hee de Filista Staut, Aschdod, ennämen sull. Un de Assiera jelunk daut.

²En de Tiet aus see jäajen de Filista kjamften, säd de HAR to Jesaja, Amoz sien Sän: Nemm die dien trua Kjleet un dien Footich auf un go soo aus daut rom. Un hee jinkj soo haulf aunjetrocken un boaft rom.

³Un dan kjeem daut, daut de HAR säd: Soo aus mien Deena, Jesaja, dree Joa es boaft un haulf aunjetrocken romjegonen, aus een Tieekjen äwa Ägipten un Kusch,

⁴soo woat de assierischa Kjennich, dee waut en Ägipten un Kusch faustjenomen sent, wajchfieren, de junge un de oole, haulf aufjetrocken un boaft, un uk met een kolet Hinjarenj. Daut woat eene sea groote Schaund fa Ägipten sennen.

⁵Dan woaren dee waut sikj opp Kusch veloten, un dee waut soon grootet vetruen opp Ägipten haben, jeschloagen sennen un äaren Moot velieren.

⁶Un de Lied delenjd daut Mäa woaren sikj froagen motten, woo see ver de Assiera woaren wajchkomen, wan dee, no woone see no Help jinjen un opp woone see räakjenden, daut soo jegonen es.