Read Plautdietsch (Low German) – De Bibel Jesaja 21 Bible Online

Jesaja 21 - Plautdietsch (Low German) – De Bibel bible

Jesaja 21

¹Dit es eene Norecht äwa de Wiltnis dicht biem Mäa: Soo aus de Stormwint von daut Launt em Sieden kjemt, soo kjemt waut von de Wiltnis, von een Launt daut to ferchten es.

²Mie es eene strenje Bootschoft kloa jeworden: “Däm, dee veroden deit, lot veroden, däm, dee vedoaft, lot vedoawen. Lot de Armeeen von Elam un Medien komen, un sikj rom de Staut loagren. Ekj woa een Enj moaken met daut hielen waut Babel aunjerecht haft.”

³Mie ritt daut en mienen gaunzen Kjarpa. Ekj sie von Angst benomen aus eene Fru en Weedoag; ekj kjremm mie wan ekj daut hia, un sie vebleft äwa waut ekj see.

⁴Mie dreit daut aula em Kopp. Mie zettat aules fa Angst; daut Owentroot, waut mie emma soo jefoll, jajcht mie bloos Forcht en.

⁵Sat dän Desch opp, lajcht de Fluadakj han; un dan lot daut scheen schmakjen. Oba plazlich roopen see: Kommandaunten komt! Wikjst junt daut Schilt en!

⁶Dit es waut de Har to mie sajcht: Schekjt dän Wajchta, hee saul woaken; lot am sajen, waut doa väajeit.

⁷Un wan hee Pieed un Kjrichswoages sitt, un eene Häad von Äsels un Kameelen, dan saul hee sea oppaussen.

⁸Dan roopt de Wajchta rauf: Har, ekj sto jieda Dach opp miene Städ opp däm Woaktorm; un ekj paus jieda Nacht opp.

⁹Horch emol, doa komen Ritta, un een Zuch Woages un Pieed; un dee sajen: Babel es jefollen; dee es jefollen! Aul de Formen, waut see fa äare Jetta oppjestalt hauden, sent oppe Ieed tweijebroaken.

¹⁰Du mien Volkj, soo jedrascht un veklunjt, waut ekj von däm HARN, dee aules rejieet, un en Israel Gott es, jehieet hab, daut saj ekj die.

¹¹Dit es de Norecht fa Duma: Doa roopt mie eena von Seir: Wajchta, es de Nacht boolt äwa? Wajchta, es de Nacht boolt äwa?

¹²Un de Wajchta sajcht: De Morjen woat komen, oba de Nacht uk wada. Wan jie mea weeten wellen, dan komt wada un froacht.

¹³De Norecht äwa Arabien: Jie Haundelsmana von Dedan, dee jie en Gruppen reisen, jie woaren mank daut Struck enne Wiltnis bliewen motten.

¹⁴Dee waut jie en Tema wonen, brinjt Wota fa dee waut darscht, un Broot fa dee waut flichten;

¹⁵wiels dee sent vom Schwieet jerant, von daut jeschoapte Schwieet, un von dän jetroknen Boagen, un von dän Opprua von een Kaumf.

¹⁶De HAR haft mie dit jesajcht: En een Joa, du kaust die daut krakjt auftalen, dan woat aules waut soo groosoatich en Kedar es, to Enj komen.

¹⁷Doa woaren mau weinich von de Soldoten met Boages von Kedar äwajebläwen sennen. Dit haft de HAR, dee en Israel Gott es, jesajcht.