Read Plautdietsch (Low German) – De Bibel Jesaja 25 Bible Online

Jesaja 25 - Plautdietsch (Low German) – De Bibel bible

Jesaja 25

¹Du HAR, best mien Gott, ekj preis die un hool dienen Nomen en Ieaforcht; du hast groosoatje Dinja jedonen krakjt soo aus du lang trigj vespruakst. Opp die kjenn wie ons secha veloten.

²Du hast de Staut gaunz venicht, un de huage Mieren enne Grunt jebrocht. De framde äare groosoatje Jebieda sent nu opp emma wajch.

³Un doawäajen preist een stoakjet Launt die, un jewaultmäsje Städa sent en Forcht ver die.

⁴De oame un dee waut Help fäld, hast du en Noot beschizt un jeholpen; du jeefst an Schutz vom Räajen, un Schauten von de heete Sonn, wan de hunjsche Fiend äwafollen aus een Owwada em Winta.

⁵Du helst de drinjende Hett enne Wiltnis opp, soo aus de Wolkjen de Hett von de Sonn trigjhoolen. Soo dolsd du däm hunjschen sien Jeschrech.

⁶De HAR, dee aules rejieet, woat hia opp disen Boajch, fa aule Velkja oppe Welt eene scheene Moltiet utreeden. Daut woat eene groote Moltiet sennen met fatet Fleesch un oola Wien, met Moakj un gooda kloara Wien.

⁷Hee woat daut Loaken aufdakjen, waut äwa aule Velkja es, un de Dakj von de Lenda wajchnämen.

⁸Gott de HAR woat opp emma dän Doot wajchnämen. Hee woat aulem en sien Volkj de Tronen wajchweschen; un woat oppe gaunze Ieed, dän schlajchten Nomen von sien Volkj, wajchnämen. Dit haft de HAR jesajcht.

⁹Aun dän Dach woaren see sajen: “Nu kjikjt. Dit es ons Gott, no wäm wie jeluat haben, daut hee ons raden wudd. Dit es de HAR opp wäm wie hopten; well wie schaftich sennen un ons freien daut hee ons jerat haft.”

¹⁰Un däm HARN siene Macht woat disen Boajch Schutz jäwen. De Moabita woaren doljedrekjt woaren, soo aus Stroo enne Mestpras doljeklunjt woat.

¹¹Un wan see uk met de Oarms langen, soo aus een Schwama biem schwamen, woat de HAR äaren Stolt doch doldrekjen, krakjt eendoont woo see met de Henj graupsen.

¹²Äare vesechade Städen un huage Mieren woaren doljebroaken un enne Grunt jebrocht woaren. Dee woaren jlikjs de Ieed em Stoff ligjen.